UEFA coefficient ranking hi kum nga liamta chhunga Europe inelna a club chet dan a zira siam thin a ni a, 2014/15 Champions League ah Barcelona chu champion mahse an hmelma lian Real Madrid chu pakhatna ni turin an la pawtthla thei hrih bik lo a ni.
Tun season Europe inelna ah Catalan giants hi an che tha hle a, point pawh hlawhchhuak hnem ber niin point 38.042 lawih an hlawhchhuak a ni. Amaherawhchu kum nga liamta chhunga teh a nih miau avangin Real Madrid chu point sarihin an la phak lo mek a ni.
Bundesliga champions Bayern Munich chu pathumna ah awmin Chelsea chu English club ranking a sang ber niin 4-na ah an awm mek. English club zingah Arsenal leh Manchester United te chu top 10 a awm phak dang an ni ve bawka, Porto, Schalke leh Benfica te hnuaiah an awm khauh thung.
Manchester City leh Tottenham te chu English club dang langsar deuhte an ni a, City 17-na an nih laiin Spurs chu 21-na an ni thung. Anderlecht, Rubin Kazan leh Villarreal te pawh phak lo tu English club chu tudang nilovin European champions tum nga zet lo ni tawh Liverpool an ni a, 42-na ah an awm.
Tun season Champions League finalist Juve chuan point 32.8 hlawhchhuakin semi-final a an pet chhuah tak Real Madrid (33.042) aiin point an hlawhchhuak tlem hret bawk. Engtin nge ranking an pek tawite in lo tarlang hlek ila.
Season nga liamta chhunga Europa League leh Champions League a club te chet dan a zira he ranking hi pek thin a ni a, first qualifying round a tla team te chu point 0.5 (chanve) chauh pek an nih laiin a round dawt leh thleng te chu point khat pek an ni. Group stage khel pha tura inpet kai te chuan point li an hlawh nghala, Group stage a hnehna an chang a nih chuan point hnih pek an ni leha, draw chuan point khat an pe leh bawk.
Chutiang zelin round of 16 an lut a nih chuan point li an hlawhchhuak leha, round an thlen san dan a zir zelin point an hlawh chho ve zel a ni. Europa League ah chuan point an in pek dan a dang hreta, Champions League a team in point an hlawhchhuah zatve chiah an hlawhchhuak.
A chunga kan sawi ang khian season nga liamta chhunga point an hlawhchhuah ang zawng zawng kha belhkhawm a ni ta thin a, an ram football association coefficient te point hmuh atangin 20% belh sak an ni ve leh bawk. Tun dinhmuna ranking chu hetiang hian:-
1. Real Madrid - 171.999
2. Barcelona - 164.999
3. Bayern Munich - 154.883
4. Chelsea - 142.078
5. Atletico Madrid - 120.999
6. Benfica - 118.276
7. Schalke 04 - 111.883
8. Porto - 111.276
9. Arsenal - 110.078
10. Manchester United - 103.078
11. Paris Saint-Germain -100.483
12. Valencia - 99.999
13. Dortmund - 99.883
14. Juventus - 95.102
15. Zenit St. Petersburg - 90.099
16. Bayer Leverkusen - 87.883
17. Manchester City - 87.078
18. Shakhtar Donetsk - 86.083
19. Basel - 84.875
20. Napoli - 84.102
* Tottenham (21st), Liverpool (42d), Celtic (55th), Newcastle (71st), Everton (74th), Stoke City (87th), Swansea City (90th), Birmingham City (91st), Fulham (93rd), Wigan (99th).