Real Madrid midfielder Luka Modric chu UEFA Best Player 2018 atan thlan a ni a, Modric hian 2017/18 season-ah khan Real Madrid chu a vawi thum nan Champions League nomawi a chawipui leh a, FIFA World Cup 2018-ah pawh a ram Croatia chu final a thlenpui hial a ni.

Modric hian top 3 short list-a a awmpui Salah leh Ronaldo te khumin he lawmman hi a dawng a, 2017/18 season khan Modric hian Real Madrid tan game 43 khelin goal 2 a khung a, assist vawi 8 a nei. Goal khung hnem lo mahse team innghahna a nih avangin a that zia chu a pholang chiang thin hle. World Cup-ah pawh champion zo lo mahse Best player atan thlan a ni hial a, hei hian team tana a thawh hlawk zia a ti lang chiang kher mai.

August ni 30, 2018 zan khan 2018/19 Champions League Group Stage draw chu Monaco-a Grimaldi Forum-ah neih a ni a. Draw neih a nih rual hian award sem nghal a ni a, 2018 World Cup best player & UEFA Men's Player of the Year Modric chuan lawmman a lak theihna chhan chu Real Madrid-a a khelhpuite bakah amah puitute zawng zawng vang a nih thu a sawi bakah a football zinkawnga hmalatu ber chu a pa a nih thu a sawi bawk.

Champion team Real Madrid chuan mimal lawmman an hui vek a, mimal lawmman hetiang hian :

UEFA Men's Player of the Year 2018 - Luka Modric

Goalkeeper of 2017/18 UEFA Champions League season - Keylor Navas

Defender of 2017/18 UEFA Champions League season - Sergio Ramos

Midfielder of 2017/18 UEFA Champions League season - Luka Modric

Forward of 2017/18 UEFA Champions League season - Crisitano Ronaldo

2017/18 Womens Champions League Player of the Season - Pernille Harder

2018 UEFA President's Award - David Beckham