UEFA Champions League last 16 hmabak

06th August 2020, 11:08PM

UEFA Champions League 2019-20 last 16 khelh hmabak chu tun kar chhungin an khel dawn a, second leg match 4 khelh tur a la awm a ni.

Coronavirus vangin inkhel tihtawp lailawk a ni a, tunah chuan Champions League last 16 second leg khelh hmabak match 4 la awm pawh an khel thei tawh dawn a. He mi hnuah hian quarter final khelh a ni ang a, first leg leh second leg a awm tawh dawn lo a, knockout in an khel zui ang.

Manchester City vs Real Madrid
Last 16 first leg an khelhah Premier League club Manchester City chuan 2-1 in La Liga club Real Madrid an hneh a, anni ang club lian pahnih inhmachhawnah chuan thil sawi chian ngam a la ni lo hle.

Pep Guardiola pawlte chu Premier League-ah pahnihna an ni a, Santiago Bernabeu ah a chak zawk an ni thei bawk a, Etihad Stadium lamah pawh tlawm an tum lo viau dawn a. Real Madrid chu tun hnaiah tlar hnung lamah an phui tha viau mai a, hei vang hian City tan pawh deh khirh hle tura ngaih an ni.

Juventus vs Lyon
First leg an khelhin Serie A champion Juventus chu an chak zo lo a, French club Lyon chu 1-0 in an chak a. Quarter final lama luh chhoh an duh a nih chuan second leg-ah chiang taka an chak ngei a tul dawn a ni.

Serie A season hman zawh takah khan a tawp lamah Maurizio Sarri pawlte chu an zuih chho hle a, hei vang hian Lyon nen an inkhelh hunah chuan tha thara tan an lak a ngai dawn chiang a ni.

Barcelona vs Napoli
Anni pahnih hi first leg-ah an inhnehtawk a, goal khat ve ve an thun thei a. Second leg-ah chak zawk an awm ngei ngei tawh dawn a, khawi zawk nge quarter final-ah tlang chho dawn hriat theih a la ni lo.

Barcelona chu Napoli ai chuan la kal zui zel tura rin kai zawk an ni a, Camp Nou-a inkhel tur an ni bawk a, Spanish club lian tan hian beiseina chu a sang zawk deuh tura ngaih a ni.

Bayern Munich vs Chelsea
Bayern Munich chuan Stamford Bridge-ah Chelsea an luhchilh a, mikhual zawk hi 3-0 ngawtin an chak thei a, quarter final lut tluk chu an ni ber tawh a. An khelmualah nasa taka an tlawm a rinawm lo hle a, hei vang hian Premier League club zinkawng chu tawp tawh tura ngaih a ni.

Bundesliga title an la zo chiah a, DfB Pokal an la tel bawk a, European title hi lak ngei an la tum hle bawk a. Chelsea tan chuan tlang sang tak lawn chhuah a tul dawn a, quarter final luh chu an tan thil huphurhawm tak a ni.

Fixtures:
7.8.2020 - Manchester City vs Real Madrid (12:30)
7.8.2020 - Juventus vs Lyon (12:30)
8.8.2020 - Barcelona vs Napoli (12:30)
8.8.2020 - Bayern vs Chelsea (12:30)

Copyright © inkhel.com 2024. All rights reserved.