Champions League Quarter-final second-leg inkhelah Barcelona chuan Camp Nou-ah Manchester United an lo mikhual a, Barcelona hi si thum faia chakin, semi-final an lut.
Barcelona tan hian Lionel Messi chuan goal hnih a khung bakah Philippe Coutinho chuan goal a khung bawk a, Barcelona hi Old Trafford-ah 1-0 a an lo chak tawh bawk avangin aggregate-ah 4-0 in United an hneh.
United in Barcelona an khelhpui hleithei lo a ni ber a, first leg-a an khelh dan atangin beiseina sang tak nen Camp Nou-ah leng lut mahse Barcelona an chungnung zawk a tih loh theih loh. Messi a khel tha em em a, United player ten ball an chhuhsak hleithei lo. Barcelona a zawm hnu a beisei pha lo tak Coutinho chu United lakah hian a khel tha a, goal khat a khung thei hi a phu hliah hliah a ni.
Barcelona 3-0 Manchester United (agg 4-0)
(Messi 16’, 20’, Coutinho 61’)
PLAYER RATINGS
Barcelona: Ter Stegen 7, Pique 6, Lenglet 6, Alba 7, Roberto 6, Rakitic 7, Sergio 6, Coutinho 8, Arthur 7, Suarez 5, Messi 8. Subs: Semedo 6, Vidal 6, Dembele 6.
Manchester United: De Gea 4, Jones 5, Lindelof 6, Smalling 6, Young 4, Fred 6, McTominay 6, Pogba 6, Lingard 5, Martial 5, Rashford 6. Subs: Dalot 7, Lukaku 6, Alexis 7.
Match Report
Barcelona hian 4-3-3 formation an hmanga, German goalkeeper Marc-Ander ter Stegen chuan si ban nghakin defence-ah Sergi Roberto, Gerard Pique, Lenglet leh Jordi Alda –te dah an ni. Midfield-ah Ivan Rakitic, Sergio Busquets leh Arthur-te awmin, hmatawngah Messi, Coutinho leh Luis Suarez-te an intlar bawk.
Ole Gunnar Solskjaer chuan a naute chu 4-3-1-2 formation-in a rem a, David De Gea chu si ban nghah tir a ni. Solskjaer hian a defence siksawi deuhin Victor Lindelof chu right-back ah a khelh tir a, Luke Shaw chu suspension avanga a khelh theih loh avangin Ashley Young chu left back-ah khelh tir a ni. Centre back-ah Phil Jones leh Chris Smalling-te an inkawpa, midfield-ah Paul Pogba, Fred leh Scott McTominay-te dah an ni. Hmatawngah Marcus Rashford leh Anthony Martial-te inkawp tir niin an hnung chiahah Jesse Lingard dah a ni.
Inkhel tan a ni a, inkhel tan tir teah United lamin hun tha em em an bawhpelh nghal; Pogba chuan veilam atangin Rashford chu through ball tha em em a pe a, Rashford hian box chhungah ball luh puiin Barca si ban nghaktu Stegen a pet khuma, mahse goal bar a per. Hemi hnu lawk hian United in chance an nei zui lehghala, mahse Rashford-a chance hmasa anga tha erawh a ni lo.
A tir minute nga chhung velin Barca an khel chhia a, United-in bul an tan tha angreng hle a, Barca hian goal an chhuah teuh thin viau bawk. Mahse Minute sawm khelh a nih chhoh in Barca khel a dik tan, 10mins velah Barca hian penalty an hlawhchhuak teuh hle a, mahse VAR-a endik a nih hnuah sut leh a ni. Hemi hnu deuh lawk hian United tan Rashford chuan chance nei lehin box pawn atangin ball a shoot-a Stegen chuan harsa lem lo takin a lo save.
Barcelona-in goal an khung zuia, 15mins-ah Young chu mual veilamah a che buai, Messi chuan ball a chan khalh zuia, Messi hian United box hrulah ball khalh pheiin, box pawn chiah atangin mawi em em in United goal bottom corner-ah a chhuih lut. Minute nga pawh a liam hma in Barca in goal an khung belha, goal khungtu hi tu dang ni lovin Messi bawk a ni; Messi hian box pawn deuh chiah atangin a ke hman thiam loh lam, a ke dinglamin United goal lamah ball a pet a, pet tha em em lo mahse United keeper De Gea chuan a chhuah tho va, Barca-in si hnih faiin hma an hruai der.
Barcelona lamin inkhel an thunun zawka, chance pawh an insiam deuh reng a tih theih. A tir minute nga chhung vel United an hlauhawm tih loh chuan United hi an hlauhawm chhunzawm lutuk lo. Half time hma lawkin United-in chance tha em em mai an nei a, Messi chuan tha taka ball khalhin United box chhung veilama awm Alba a pe a, Alba hian dinglamah Sergi Roberto pe phei lehin, Roberto hian pet goal-na hun tha tak nei mahse De Gea chuan a save a, 2-0 in first half tihtawp a ni.
Second half-ah pawh Barcelona an chungnung zawk a, second half tan tir teah Barca hian chance tha em em mai an hlah nghal. Darkar khat chuang hret khelh a nihin Barcelona-in an goal thumna an khunga, mual veilamah Alba ball pek niin, Alba hian Coutinho a pe nghal, Coutinho hian box pawn atangin mawi takin United goal-ah ball a chhuih lut, si thum faiin Barca –in hma an hruai. Coutinho-a goal khung hnu lawkah Messi chuan chance nei ve leh mahse goal-ah a chantir thei lo.
United lam hi an che hleithei lo a ni ber a, chance nei ve bawk thin mahse Barca tan an hlauhawm tak tak thei lo. Solskjaer chuan Alexis Sanchez leh Romelu Lukaku-te dah luh belh mahse United hian goal an khung thei chuang lo. Hun tawp hnaih lamah Suarez chuan box pawn atangin United goal lamah ball a pet a, pet chhe lem lo mahse a sang hret.
Suarez-a chance neih hnu lawkah United-in goal an khung teuh hle a, mual dinglamah Diogo Dalot chu ball pek niin, ani hian Barca box chhungah a cross lut a, Sanchez chuan lo tauhin Stegen chuan tha zetin a lo save a, Barca goal chhuah tur a lo dang. Injury time-ah Arturo Vidal chuan United box chhungah ball changin a thlanga awm Suarez a pe a, Suarez hian a thlang leha rawn inpawt Messi-a tan ball hi tlang tirin, Messi hian box chhung veilam deuh atangin United goal-ah a ke veilamin ball a pet a, De Gea chuan a lo save. Inkhel hi 3-0 in a tawp zui a, khel tha zawk leh chak phu zawk Barcelona chu aggregate-ah 4-0 in an chaka, hun eng emaw chen hnuah semi-final an lut leh a ni.
