Real Madrid chuan UEFA Champions League group stage inkhelah Maldovan club Sheriff an luhkhung a, khual mualah Real Madrid hi si thum faiin an chak a, Round of 16-ah an inpet kai.

Real Madrid tan hian David Alaba, Toni Kroos leh Karim Benzema-te chuan goal khat theuh an khung a, Real hian point thum an hawn.

Khelh ngaah Real Madrid hian point 12 hlawhchhuak tawhin, Group D-ah hmahruaitu an ni a, Sheriff hian point 6 neiin, pathumnaah an awm meka, Sheriff hi an dinhmun a danglam thei tawh lo.

Group D inkhel dangah Inter Milan chuan Edin Dzeko-a goal hnih hmangin Shakhtar an hneh a, heti hian Inter hian point 10 an nei a, pahnihnaah awmin, point khat bak la hlawhchhuak lo Shakhtar chu palinaah an awm ve mek bawk a ni.

Real leh Sheriff inkhelah hian first half-ah goal hnih a lut a, darkar chanve chiah khelh a nihin Austrian defender Alaba free-kick pet chuan Cristiano perin goal-ah a lut zui a, si khat faiin Real-in hma an hruai.

Half time hma chiahin Real-in an goal hnihna an khung a, German defender Kross chuan goal-ah ball a pet a, ball hian cross bar perin, goal line chhung velah chiah a sawt lut a, 2-0 in Real hian hma an hruai.

Real goal thumna hi second half-a minute sawm vel an khelha lut a ni a, box hmawr atangin French striker Benzema chuan nalh takin goal-ah ball a chhuih lut a, 3-0 in Real hian hnehna an chang ta a ni.

Sheriff 0-3 Real Madrid

(Alaba 30’, Kroos 45+1’, Benzema 55’)

Player Ratings