Nilaini zanlai khan UEFA Champions League quarter-final first-leg inkhelah, champion lai Real Madrid chuan Chelsea an lo mikhuala, 2-0 in Real Madrid hi an chak.

Santiago Bernabeu-ah hian Real Madrid tan French striker Karim Benzema leh Spanish winger Marco Asensio te chuan goal an khung a, Los Blancos hian harsatna liantham tawk lovin hnehna an chang.

Inkhel an tan a, minute hnih pawh an khelh pum hma in Chelsea in chance tha tak an nei a, Joao Felix chu through ball tha tak pek niin, Real Madrid box chhunga ball a khalh luh hnuah Felix hian shoot a, Eder Militao-a'n a tihbuai hman bawk avangin, a shoot tha lova, Thibaut Courtois-a'n awlsam takin a lo save.

Minute sawmhnih an khelhin Real Madrid in goal an khunga, Dani Carvajal chuan Chelsea box chhungah ball tha tak a vawrh lut. Vinicius Junior chuan goal ah tlawhin, Kepa Arrizabalaga chuan lo khawih mah se, a piaha awm Benzema chuan goal ah a khung a, Real Madrid in si khat faiin hma an hruai.

Lehlamah Chelsea in chance an nei ve leh nghala, Reece James chuan dinglam atangin ball a cross a, Reheem Sterling chuan lo khawih mah se, Courtois-a'n a save. Chelsea an bet hle a, ball an chan pawhin a chang rei thei meuh lo. Real Madrid in shot an ngah a, clear chance erawh sawi tur a tam lo thung.

Darkar khat an khelhin Chelsea buaina belhchhah turin Ben Chilwell hnawhchhuah a ni. Chilwell hian box pawn chiahah Rodrygo a pawt thlu a, English left-back hi referee chuan direct red card a pe. 70mins chuang an khelhin Real goal hnihna a lut a, bench atanga lut Asensio chuan box pawn atangin goal ah ball a chhuih lut a, 2-0 a ni.

Injury time ah Mason Mount chuan goal a khung teuh hle a, mahse a shot chu Real defender Antonio Rudiger-a'n a block sak. Chelsea hian kawng tinrengah Real Madrid hi an hneh lova, karleh Thawhlehni zanlaiah second-leg khelh a ni dawn a, Chelsea hian Stamford Bridge-ah hna hautak tak an nei dawn a ni.