UCL: Messi-a goal mawi in PSG a chakpui zo lo

06th October 2022, 10:10AM

Nilaini zanlai khan, UEFA Champions League group stage inkhelah, Ligue 1 champion Paris Saint-Germain chuan Group H inkhelah Portuguese club Benfica an tlawh a, team hnih te an inhnehtawk.

Group H inkhel dangah Serie A club Juventus chuan Israeli Premier League champion lai Maccabi Haifa an lo mikhual a, Juventus hian 3-1 in an mikhual te hi an lo hneh.

Khelh thum hnuah Group H-ah hian PSG chu hmahruaitu an ni a, point 7 an nei a, an dawt chiaha awm Benfica pawhin point 7 tho an nei. Pathumnaah Juventus an awm a, Turin club hian point 3 hlawhchhuak tawhin, point la nei lo Maccabi Haifa chu palinaah an awm a ni.

Benfica leh PSG inkhel hi 1-1 in a tawp a, PSG tan hian Lionel Messi chuan goal a khung a, Benfica goal hi PSG defender Danilo-a own-goal a ni.

Mual neitu lamin bul an tan tha zawk a, chance tha pawh a tir lamah an nei nghal a, Goncalo Ramos leh David Neres te chuan PSG goalkeeper Gianluigi Donnarumma an tibuai ve ve.

Mahse minute sawmhnih chuang hret an khelhin PSG-in hma an hruai a, Messi chuan Benfica box pawn lawka awm Kylian Mbappe ball a pe; Mbappe hian Neymar pein, Neymar hian Messi a pe thla ve leh a, Messi hian box pawn atangin mawi zetin goal-ah ball a chhuih lut a, si khat faiin PSG hma a hruaipui.

Minute sawmhnih hnuah Benfica-in an si phurh an sut a, Enzo Fernandez chuan mual veilam atangin PSG box-ah ball cross lutin, goal-ah a lut zui a, ball khawih hnuhnung bertu PSG defender Danilo Pereira own-goal anga kal tir a ni.

Juventus chuan tun season Champions League-ah a vawi khat nan hnehna an chang a, an game hmasa pahniha an tlawm ve ve hnuah, Maccabi lakah hnehna pawimawh tak an chang.

Juventus leh Maccabi Haifa inkhelah hian Juventus tan Adrien Rabiot chuan goal hnih a khung bakah, Dusan Vlahovic chuan goal khat a khung bawk a, Maccabi tan hian Dean David chuan goal a khung ve bawk.

Darkar chanve chuang an khelhin, Angel di Maria-a’n box chhunga tlan lut Rabiot chu ball tha zet a pe a, French midfielder hian chiang takin goal-ah a pet lut a, 1-0 a ni. Second half tir teah Juventus goal hnihna a lut a, midfield atangin Di Maria bawk chuan Vlahovic chu through ball tha zet a pe; Vlahovic hian free takin Maccabi goal lamah ball a khalh phei a, box chhung vel chiah atangin a ke veilamin goal-ah a khung a, si hnih faiin Juventus in hma an hruai.

Darkar khat chuang hret an khelhin Vlahovic hian goal khung leh mah se, hei erawh a offside chiah chiah avangin pawm a ni lo. Hemi hma chiah hian Maccabi pawhin chance tha tak an nei a, Atzili chuan yard 22 vela hla atangin si ban a pet per.

75mins-ah bench atanga dah luh a nih hnu lawkah David chuan Maccabi goal neih chhun a khung a, David hian through ball umin, goal-ah a chantir chhunzawm a, 2-1 a ni. 80min an khel chho a, Atzili chuan woodwork a pet per leh; Maccabi hian free-kick hlawhchhuakin, free-kick atang hian Atzili chuan woodwork a pet per a, Maccabi tan a uiawm hle.

Atzili-a chance tha neih hnu lawkah Juventus hian an goal thumna an khung a, corner atanga ball vawrh luh chu, near-post lama awm Rabiot chuan mawi takin goal-ah a tauh lut a, 3-1 in italian club hian hnehna an chang ta a ni.

Copyright © inkhel.com 2022. All rights reserved.