Nilaini zanlai khan UEFA Champions League round of 16 first leg inkhelah, Chelsea chuan German club Borussia Dortmund an tlawha, si khat faiin Dortmund hi an chak.

Inkhela goal awm chhun hi Karim Adeyemi-a thun a ni a, Dortmund hian Signal Iduna Park-ah hnehna pawimawh tak changin, March thla ni 7 zan laia second leg an khel dawn a ni.

Adeyemi hian 63mins-ah goal pawimawh tak hi a khung a, Chelsea hian corner hlawhchhuak mah se, Dortmund lamin an clear. Adeyemi chuan an half lamah ball changin, Chelsea goal lamah ball a khalh. A speed hmang tangkaiin Adeyemi hian Enzo Fernandez a paltlang hnuah, Chelsea goalkeeper Kepa Arrizabalag a bum leh a, goal-ah pet lutin, Dortmund hma a hruaipui.

Chelsea hian first half-ah goal khungna hun tha an nei a, Kai Havertz-a ball pek chu Joao Felix chuan tlanpuiin Wolf a bum hnuah shoot mah se, cross bar a pet pera, Chelsea tan a uiawm hle. First half chhungin shot 16 ngawt kan hmu a, mahse shot on target erawh team hnihte atangin kan hmu lo.

Second half-a minute sawm an khelhin Chelsea in free kick an hlawhchhuaka, Reece James chuan free kick atang hian shoot tha viau mah se, Dortmund goalkeeper Kobel chuan a aia tha in a lo save sak.

Goal an chhuah hnuah Chelsea hian 77-ah an si phurh sutna hun tha tak an nei a, Mason Mount-a ball pek chu, box chhung atangin Koulibaly chuan rem takin a shoot a, mahse Kobel bawk chuan lo dangin, ball hian goal line a pelh hmain Emre Can chuan a pet chhuak zui bawk. Chelsea hian chance ngah mah se a tawp thlengin goal a thun thei lova, 1-0 hian inkhel a tawp.

Champions League round of 16 first leg inkhel dangah Benfica chuan Club Brugge an tlawha, mikhual lam Benfica hian si hnih faiin hnehna an changa, Joao Mario leh David Neres te chuan goal khungin, Mario-a goal hi penalty spot atanga thun a ni.

Benfica leh Club Brugge te hian, March thla ni 7 zanlaiah second leg an khel dawna, Club Brugge hi Portugal-ah an zin ve thung dawna, si hnih faia hma hruai sa in Benfica hian Estadio da Luz-ah Club Brugge hi an lo mikhual dawn a ni.