UEFA Champions League quarter final khelh tan a ni a, Premier League champion lai Manchester City leh Bundesliga champion lai Bayern Munich te inhmachhawnin, Premier League champion City hi an chungnung zawk.
City home ground Etihad Stadium-ah first leg hi khelh a ni a, City hian si thum faiin Bayern hi an hneh. City tan Rodri, Bernardo Silva leh an goal thun khawp Erling Haaland te chuan goal khat theuh an thun a ni.
Haaland hian record thar a siam leh ta a, season kal mekah kum 22 mi hian competition hrang hrangah City tan goal 45 a khung tawh a, Premier League player awm tawh zingah season khat chhunga competition hrang hranga goal 45 khung tling thei hi a hmain an la awm ngai lo.
Darkar chanve an khelh tlin hma deuhin Manchester City in goal an khung a, Rodri chu box pawnah ball pek niin, Rodri hian Bayern player pakhat a bum hnuah box pawn atangin mawi zetin, a ke veilamin goal ah ball a chhuih lut a, City hma a hruaipui. Darkar chanve chuang an khelin City in goal an thum belh teuh hle a, Kevin de Bruyne chuan dinglam atangin box ah ball a vawrh lut a, Bayern goalkeeper Yann Sommer chuan Ilkay Gundogan-a lamah nem chhuakin, Gundogan chuan goal ah ball a pet ve leh nghal a, mahse Sommer hian a ke in a lo save leh.
Second half an tan hnu lawkah Bayern in chance an insiam a, Leroy Sane chuan City goal lamah ball khalh pheiin, box pawn atangin Sane hian a shoot a, mahse City si ban nghaktu Ederson-a'n harsatna liantham awm lovin a lo dang. A hnu lawkah Sane bawk hian, a hmun ngai atang vel hian a shoot leh a, mahse hei pawh hi Ederson chuan a lo save.
Lehlamah City in Bayern tlarhnung tihsual atangin chance an nei zui ve leh nghala, mahse City hian Bayern tihsual hi an chhawr tangkai thei ta lo. Second half a minute sawm an khelh tlin hma deuhin Sane bawk chuan chance a nei leha, a hma a chance a neihna side lehlam atangin a ni ve thung. City winger hlui hian box pawn dinglam atangin a ke veilamin goal ah ball a pet a, pet chhe lo viau mah se, Ederson bawk lo awm lehin, City shot stopper hian a lo save leh a ni.
City in chance an nei chhunzawm ve leh a, Nathan Ake chuan box chhung veilam atangin goal ah ball a pet a, Sommer chuan lo save in City in corner an hlawhchhuah. Corner atanga ball vawrh luh a nih hnuah, City hian chance an nei leh a, Ruben Dias-a shot chu Sommer bawk chuan a lo nem chhuak leh.
70mins ah City goal hnihna a lut a, Bayern tlarhnung tihsual atanga an thun a ni. Bayern defender Upamecano chuan ball khalhin, Jack Grealish-a'n a chhuhsak. Grealish hian Haaland pe in, Haaland hian box chhung veilam atangin a cross a, Bernardo chuan goal ah lo tauh lutin, si hnih faiin City in hma an hruai. Goal an thun belh hnu lawkah City in chance an nei leh a, mahse Julian Alvarez-a shot chu Sommer bawk chuan save.
77mins ah City hian goal an thun belh leh ta nge nge a, mual dinglam atanga Bayern box a ball vawrh luh chu, John Stones chuan lo tuahin, Haaland a pe a, Haaland hian goal ah khungin, 3-0 a ni. 90mins hnaih tawh lamah City in goal an thun belh teuh hle a, corner atanga ball vawrh luh chu Rodri chuan lo tauhin, Sommer chuan a kut hmawrin a lo nem chhuak thei hram.
City an khel tha hle a, Bayern hian an hneh meuh lo. Second half-ah Bayern in bul tan tha viau mah se, an chance neih te an hmang tangkai lova, an khel rei tulh tulh a, City an khel tha tulh tulh a ni ber. Nuamsa takin City hi an chak a, second leg hi karleh Nilaini zanlaiah an khel dawn a ni.
