UEFA Champions League round of 16 first leg inkhelah Manchester United chuan La Liga champion lai Atletico Madrid chu Wanda Metropolitano-ah an tlawh a, team hnih te hi 1-1 in an inhnehtawk.

Atletico Madrid tan Joao Felix chuan goal a khung a, United tan hian Anthony Elanga chuan a khung ve thung a, goal neih zat inangin Old Trafford-ah second leg an khelh dawn a ni.

Inkhel tan tir teah Atletico hian hma an hruai nghal a, Brazilian wing-back Renan Lodi chuan United box chhungah ball a pe lut a, Portuguese forward Felix chuan goal-ah a lo tauha, si ban perin ball hi goal-ah a lut a, mual neitu lamin hma an hruai.

Atletico in goal an khung hnuah United hian ball an chang tam zawk a, goal erawh an khung thei lova, chance insiamchhuah pawh an harsat. First half-ah Atletico hian ball possession 33% chiah nei mahse shot paruk leh shot on target pakhat an nei bawk a, possession ngah zawk United hian shot on target an nei lova, shot pawh vawi hnih chiah an nei.

Atletico hian si hnih faiin hma an hruai teuh hle a, Lodi chuan box-ah ball a cross lut leh a, far post lama awm Sime Vrsaljko chuan a lo tauh, Victor Lindelof-a’n a lo khawih a, ball hi cross bar a per.

Second half-ah boruak a tang tha at at hle a, yellow card vawi riak lai phawrh niin, Luke Shaw, Lindelof, Reinildo, Llorente, Fred, Marcus Rashford, Jose Maria Gimenez leh Alex Telles te chuan yellow card an hmu vek.

United hian goal an rawn khung a, 80mins-ah bench atanga dah luh Elanga chuan United tan goal pawimawh em em mai khungin United si phurh a rul a, hei hi United shot on target neih hmasak ber a ni nghe nghe.

Atletico hian hun tawp dawnah cross bar an pet per leh a, bench atanga dah luh Antoine Griezmann chuan cross bar a pet per a, Atletico chakna goal a thun teuh hle. Goal luh belh tawh lovin 1-1 in inkhel hi tihtawp a ni ta a ni.

Atletico Madrid 1-1 Manchester United

(Joao Felix 7') (Elanga 80')

Player Ratings