UCL: A vawi khat nan Chelsea an chak

06th October 2022, 09:10AM

Chelsea chuan Nilaini zanlai khan Champions League group stage Group E inkhelah Serie A champion lai AC Milan chu Stamford Bridge-ah an lo mikhual a, si thum faiin Chelsea hi chakin, season kal mekah a vawi khat nan Chelsea hian Champions League-ah hnehna an chang.

Chelsea hian an group stage game hmasa pahniha hnehna an chan zawh tawh loh veve hnuah, Millan lakah hian hnehna pawimawh tak an chang a, London club tan hian Wesley Fofana, Pierre-Emerick Aubameyang leh Reece James te chuan goal khat theuh an khung.

Group C inkhelah dangah Austrian champions Red Bull Salzburg chuan an mikhual Dinamo Zagreb chu si khat faiin an hneh bawk a, he inkhela goal awmchhun hi Noah Okafor-a’n penalty spot atanga a thun a ni.

Heti hian Group E-ah hian khelh thum khelh a nih hnuah Salzburg chu hmahruaitu an ni a, point 5 an hlawhchhuak tawh. Chelsea chu pahnihnaah awmin, pathumnaa awm AC Milan nen point 4 ve ve an nei a, point 3 neiin Dinamo Zagreb chu palinaah an awm ve thung a ni.

Chelsea leh AC Milan inkhelah hian, 24mins-ah goal hmasa ber a lut a, Ben Chilwell chuan corner atangin Milan box-ah ball a vawrh lut a, hei hi Thiago Silva chuan goal-ah lo tauh mah se Milan keeper Ciprian Tatarusanu-a’n a lo save. Tatarusanu-a’n Silva ball tauh a save hnu hian Milan-in an box chhunga ball awm an clear thei lova, Fofana chuan goal khung chhunzawmin Chelsea hma a hruaipui.

French defender Fofana hi half time hma deuhin a inhliam a, lakchhuah niin, a hmunruak-ah Trevoh  Chalobah dah luh a ni. First half-ah goal khat bak a lut lova, second half-ah minute sawm an khelhin, dinglam atanga James-a ball cross chu Aubameyang chuan goal-ah a lo thun a, Chelsea goal hnihna a lut.

Aubameyang assist tu James hian minute nga hnuah goal a khung zui ve leh nghal a, box hmawrah Raheem Sterling chuan ball changin, a dinglama box chhunga rawn inpawt lut James chu ball a pe. James hian box chhung dinglam atangin goal a khung a, 3-0 in Chelsea hi an chak a, James hi Player of the Match atana thlan a ni zui bawk a ni.

Copyright © inkhel.com 2022. All rights reserved.