Parc des Princes-ah mikhual Barcelona chuan 3-1 in mual neitu PSG an hneh a, Champions League semi final lut turin Barcelona chu dinhmun thaah an ding mek a ni.
Barcelona tan Neymar chuan goal hmahruai a khung hnuah Suarez chuan goal ropui pahnih a khung a, PSG tan hun tawp dawn minute 8 la awmin Van der Wiel chuan goal khat a khung ve hlauh a, 3-1 in Barcelona chuan hnehna an chang ta a ni.
PSG tan an striker rinrawl Ibrahimovic a inlan thei lova, Chelsea nen last 16 match-a hnawhchhuah a tawh vangin first leg-ah Barcelona a hmachhawn ve thei ta lo. PSG hian hrem vangin an midfielder Marco Verratti an chhawr thei lo bawk.
Barcelona tan Dani Alves chu hrem vangin a inlan thei lova, Adriano chuan Alves ai a awh. Vermaelen chiah Luis Enrique hian inhliam chhawr theih loh a neih awmchhun a ni.
PSG 1-3 Barcelona
(Van der Wiel 82') (Neymar 18', Suarez 67', 79)
PSG : Sirigu, Van der Wiel, Thiago Silva (David Luiz - 21' ), Marquinhos, Maxwell, Rabiot (Lucas Moura - 65' ), Cabaye, Matuidi, Lavezzi, Cavani, Pastore
Barcelona : ter Stegen, Montoya, Pique, Mascherano, Alba, Rakitic (Mathieu - 74' ), Busquets, Iniesta (Xavi - 53' ), Messi , Suarez, Neymar
PSG hian a tir atangin defence lamah harsatna an tawk nghal. Messi chuan Catalan tana goal a khung nghal teuh hle. 14th mins-ah box pawn atangin tha zetin a thuai a, mahse goal post a per hlauh. Minute 20 an khelh tlin hmain mikhual Barcelona hian goal an khung ta.
18th mins-ah Messi chuan attacking third-ah ball a tlanpui a, mual veilam sira Neymar tlan lut chu pein, ani hian box chhungah a umlut a, cool takin a pet goal chhunzawm. Si khat faiin Barcelona chuan hma an hruai. Neymar hian tun season Champions League match 8 atangin goal 4 a khung ta a ni.
PSG hian an defender Silva chu inhliam vangin an lakchhuah a ngai. Inhliam damkawr David Luiz luhtir a ni a, Suarez lakah ball a hloh nghal, a tihsual vangin an lamah goal a lut teuh hle. First half chhungin PSG hian an si phurh an rul teuh hle a, Cavani chuan free takin penalty area pawnah ball a chang, a tlanluhpui anga, a pet goal mai dawn emaw tih laiin a tlu palh hlauh a, awmze nei lovah a chhuah ta a ni.
Second half tan tirah PSG hian na takin an nawr nghal a, Pastore chuan box pawn atangin tha zetin a shot a, Barcelona goalkeeper ter Stegen chuan a lo dang hman hlauh. Iniesta chuan a kawng a tih hliam palh avangin zawn chhuah a ni a, Xavi chuan a rawn thlak a. 67th a ni a, Suarez chuan goal ropui a khung.
Martín Montoya ball pass tha zet chu box chhungah tlan luhpuiin, defender pathum a bum tlang hnuah a shot a, a goal, a va ropui tak em. Si hnih faiin Barcelona chuan hma an hruai ta der mai. PSG hian goal khung tumin an nawr let nghal thuai thuai a, Cavani chuan goal khungna chance tha zet a nei, kawh zetin goal mouth-ah a pet, mahse Barcelona keeper ter Stegen chuan tha zetin a lo dang hman.
Defender manto David Luiz a chesual leh ta, 79th mins-ah Suarez chuan ball changin, Luiz chuan thatchhe deuhin a lo chang a, Suarez hian Luiz kapkarah pet lutin, a paltlang ta mai. Goal keeper chiah a hmachhawn tihin Suarez hian top corner-ah chiang takin a pet goal leh, si thum faiin Barcelona chuan hma an hruai ta.
PSG tan Van der Wiel chuan hun tawp dawn minute 8 la awmin goal khat a khung ve hlauh. Box pawn atanga a shot tha zet chu Barcelona defender Mathieu chuan a lo dang kawi zauh a, Barcelona goalkeeper ter Stegen tan dan ngaihna a awm lo, a goal ta. Hun tawp dawn tak takah Cavani chuan hnai set sawt atangin goal khungna chance nei mahse Mathieu chuan a lo dang hman hlauh mai. Goal dang a lut tawh lo, 3-1 in mikhual Barcelona chuan Parc des Princes-ah hnehna an chang ta a ni.
PSG tan an striker Zlatan-a awm loh a lang chiang hle. Hetih lai hian an goal chhuah hote erawh defender te inthlahdah vanga lut a ni kan ti thei awm e. Goal hmasa ber Neymar-a khung kha marking that tawk loh vang a ni a, Suarez goal hnih kha David Luiz ngaihsam vang kan ti thei bawk awm e. Away-ah Barcelona hian goal thum lai an khung ta si a, Camp Nou-ah Zlatan pawh khel pawh nise PSG tan chuan come back a har ta khawp ang le.