​UCL Round of 16 result

19th February 2020, 11:02AM

Tun season UEFA Champions League Round of 16 khelh tan a ni a, champion lai Liverpool chu Atletico Madrid lakah tlawmin, French heavyweight Paris Saint-Germain chuan Borussia Dortmund an hneh loh bawk.

Spanish club Atletico Madrid chuan Wanda Metropolitano Stadium-ah Premier League champion tura ngaih Liverpool an lo mikhuala, Atletico hian Premier League lama tu ma la hneh theih loh Liverpool hi 1-0 in an lo hneha, Liverpool hian away goal nei lovin Anfield-ah Atletico an lo mikhual a ngai dawn.

Goal awmchhun hi Saul Niguez-a khung a ni a, ani hian inkhel tan tir teah goal hi khungin, inkhel chhung zawngin goal luh belh a awm lova, Atletico chuan he goal hi an chakpui ta a ni.

Atletico hian bul an tan tha a, an khel pawh a ranga, inkhel tir teah corner an hmu nghal; Koke chuan corner atang hian Liverpool box chhungah ball a vawrh luta, Fabinho chuan lo khawih hmasa in Saul chuan goal-ah a lo khunga, inkhel chhung zawnga goal awmchhun a khung.

Inkhel a hmuhnawm thawkhat viaua, team hnihte an innawr tawna, chance tha tak tak pawh an insiam a tih theih. Second half lamah pawh team hnihte hi an innawr tawn leh viaua, mahse Liverpool hi ball chang tam zawk niin, inkhel pawh an thunun zawk daiha, mahse inkhel chhung zawngin shot on target an nei thei lo.

Atletico Madrid 1-0 Liverpool

(Saul 4’)

Shots: 7-8

Shots on target: 2-0

Pass accuracy: 67%-85%

Possession: 27%-73%

Player Ratings

Atletico Madrid: Oblak 6, Vrsaljko 6, Savic 8, Felipe 8, Lodi 8, Koke 7, Saul 7, Thomas 7, Lemar 6, Morata 5, Correa 6. Subs: Llorente 5, Vitolo 6, Diego Costa 6.

Liverpool: Alisson 6, Alexander-Arnold 5, Van Dijk 5, Gomez 6, Robertson 7, Fabinho 6, Henderson 6, Wijnaldum 5, Salah 5, Firmino 5, Mane 5. Subs: Origi 5, Oxlade-Chamberlain 6, Milner 6.

Borussia Dortmund chuan mi sing riat chuang lenna Signal Iduna Park-ah PSG an lo mikhuala, inkhel hmuhnawm takah mual neitu lam Dortmund hian 2-1 in hnehna an changa, PSG hian away goal khat neiin Parc des Princes-ah Dortmund hi an lo mikhual ve leh dawn.

He inkhelah hian Norwegian rawlthar goal khung atchilh bur Erling Haaland chuan Dortmund tan goal hnih ngawt a khung leha, PSG tan hian khawvela footballer manto ber Neymar chuan goal khat a khung ve bawk. Haaland hian Dortmund tan game 7 chiah la khelin goal 11 a khung tling der tawh a ni.

Inkhel tan tir lam hi inkhel hmuhnawm tak tia sawi tur a ni lova, game pawh a muang angreng viau. Second half lamah engkim a danglam chho a, 69mins-ah kum 19 Haaland chuan Dortmund hi hma a hruaipui; Hakimi chuan Reyna ball a pe a, Reyna hian yard 10 vela hla atangin a shoot, Marquinhos chuan lo dangin Haaland chuan ball a hmuh chu goal-ah a lo chantir.

Dortmund-in goal an khung atanga minute ruk hnuah PSG lamin an si phurh an suta, ding lamah Kylian Mbappe chuan ball a khalh pheia Dortmund player 3 a bumin box chhungah a luhpui, Neymar pe in, Brazilian forward chuan awlsam takin goal-ah a lo khunga, 1-1 a ni.

Dortmund hian PSG-in goal an khung atanga minute hnih chauh a liam tihah hma an hruai leh nghala, Reyna chuan Haaland chu ball a pe a, Haaland hi PSG goal atangin yard 20- vela hlaah a awma, goal-ah ball hi kawh taka shoot pheiin PSG keeper Keylor Navas-a tan tih theih a awm lova, mawi takin goal-ah a lut. 80mins chuang hret khelh a nihin Neymar chuan si ban a pet per bawka, mahse a tawp thlengin goal luh belh awm tawh lovin 2-1 in inkhel tihtawp a ni ta a ni.

Borussia Dortmund 2-1 PSG

(Haaland 69’, 77’) (Neymar 75’)

Shots: 12-10 

Shots on target: 3-3 

Pass accuracy: 87%-89% 

Possession: 47%-53%

Player Ratings

Borussia Dortmund: Burki 6; Zagadou 6, Hummels 7, Piszczek 7; Guerreiro 6, Can 7, Witsel 6, Hakimi 7; Sancho 8, Haaland 8, Hazard 6 Subs: Schmelzer 6, Reyna 7

Paris St Germain: Navas 7; Meunier 6, Silva 6, Kimpembe 6, Kurzawa 5; Gueye 5, Marquinhos 7, Verratti 7; Di Maria 6, Mbappe 7, Neymar 7 Subs: Sarabia 6

Copyright © inkhel.com 2024. All rights reserved.