16 Sep 2015 04:07

Inkhel

Mizo Sports Website hmasa ber

UCL : Ronaldo hattrick hmangin Real an chak

Real Madrid chuan Champoins League Group Stage match hmasa berah Shaktar Donetsk an mikhual a, Santiago Bernebeu-ah Real Madrid hian 4-0 in an mikhualte hi an hneh a ni.

Real Madrid tan Benzema chuan goal hmahruai a khung a, a hnuah Ronaldo chuan hattrick a siam zui bawk a, Champions League-ah Ronaldo hian goal 80 a khung ta der mai le. Messi nen khan goal 77 khung ve vein, top scorer kha an ni dun a, tunah erawh Ronaldo chuan Messi a tlansan ta.

Goal hmasa ber hi 30th mins-a lut a ni a, cross ball tha tak chu Shaktar Donetsk goalkeeper Pyatov chuan a thlauh hlauh mai le, chuveleh rang takin Benzema chuan a pet goal chhunzawm ta a. Second half tan tirah Taras Stepanenko hnawh chhuah a ni a, kim lovin Shakhtar Donetsk an khel tan ta.

Ronaldo chuan 55th mins leh 63rd mins-ah penalty atangin goal a khung a, hun tawp dawn minute 9 la awmin Ronaldo chuan a tauh goal leh a, hattrick a siam ta a, 4-0 in Real Madrid chuan hnehna an chang ta a ni. Ronaldo hian Real Madrid tan game hnuhnung 10 atangin goal 19 lai a khung der mai.

Ronaldo hian goal 80 khung tawhin Champions League goal khung hnem ber a ni mek. Tin, Real Madrid kawr ha chunga Champions League goal khung hnem ber chu Raul kha a ni a, Real kawr ha chungin Ronaldo hian Champions League goal khung hnem ber nih theihna chance a nei dawn tlat mai, Raul-a record goal thum chiahin a phak tawh lo a ni.

Group A match pakhat zawkah PSG chuan si hnih faiin Malmoe FF an hneh a, Di Maria chuan tan atanga minute 4-na lekah goal hmahruai a khung a, second half minute 61 naah Cavani chuan goal hnihna a khung bawk a ni. Group B-ah PSV chuan 2-1 in Man Utd an hneh a, Wolfsburg pawhin si khat faiin CSKA Moscow an hneh a, goal awmchhung hi Draxler-a khung a ni.

Group C-ah Atletico Madrid chuan si hnih faiin Galatasaray an hneh a, Atletico goal hnihte hi Antoine Griezmann khung ve ve a ni. Tin, Benfica pawhin Nicolas Gaitan goal hnih hmangin Astana an hneh bawk a.

Group D-ah Juventus chuan 2-1 in Manchester City an hneh a, Sevilla pawhin si thum faiin Borussia Moenchengladbach an hneh a, Sevilla tan Kevin Gameiro chuan penalty atangin goal hnih a khung a, Yevheniy Konoplyanka chuan goal khat a khung bawk a ni.

Champions League Results :

Group A

Paris Saint Germain 2 - 0 Malmoe FF

Di Maria 4', Edinson Cavani 61'

Real Madrid 4 - 0 Shakhtar Donetsk

Karim Benzema 30', Ronaldo 55'pen, 63' pen, 81'

Group B

PSV Eindhoven 2 - 1 Manchester United

(Hector Moreno 45', Luciano Narsingh 57') (Depay 41')

Wolfsburg 1 - 0 CSKA Moscow

Draxler 40'

Group C

Benfica 2 - 0 FC Astana

Nicolas Gaitan 51', 62'

Galatasaray 0 - 2 Atletico Madrid

Antoine Griezmann 18' 25'

Group D

Manchester City 1 - 2 Juventus

(Chiellini 57' OG) ( Mario Mandzukic 70', Morata 81')

Sevilla 3 - 0 Borussia Moenchengladbach

Kevin Gameiro 47'pen, 66'pen, Yevheniy Konoplyanka 84'