UEFA Champions League quarter final game hmasa berah French heavyweight Paris Saint-Germain chuan Italian club Atalanta chu 2-1 in an hneha, semi final khel turin an inpet tling.
PSG hian kum 1995 hnuah a vawi khat nan Champions League semi final an thlenga, chak lo zawk Atalanta hi an vawi khat Champions League khelhnaah quarter final an thleng.
Atalanta hian Mario Pasalic-a goal khat hmang hma an hruai renga, an chak mai dawna a lan hnuah PSG lam hian 90mins khelh a nih hnuah goal hnih an khunga, Atalanta an lehthal. PSG tana goal khung tu te hi Marquinhos leh Eric Maxin Choupo-Moting te an ni.
Atalanta hian 3-4-1-2 formation an rawn hmanga, Sportiello chuan si ban nghakin, defence-ah Djimsiti, Caldara leh Toloi-te dah an ni. Midfield-ah De Roon leh Freuler te an awma, wingback-ah Gosens Hateboer te tlanin, hmatawngah Pasalic leh Zapata te inkawp tir an ni a, an hnung chiahah Serie A Midfielder of the Season Gomez dah a ni.
PSG hian 4-3-3 formation an hmanga, Keylor Navas chuan goal ven tir a ni. Defence-ah Kehrer, Thiago Silva, Kimpembe leh Juan Bernat te awmin, midfield-ah Idrissa Gueye, Marquinhos leh Ander Herrera-te an awm. Hmatawngah Mauro Icardi, Neymar leh Sarabia te an tlan bawk.
PSG hian an player pawimawh chhawr theih loh an nei nuala, Marco Verratti chu a inhliam avangin a khel thei lova, Angel di Maria chu an suspend avangin inkhel thei lo bawkin, damkawr Mbappe chuan inkhel bul a tan thei lo bawk.
PSG hian inkhel an thunun zawka, team tha zawk pawh ni mahse goal hmaah an hriam tawk lo hle. Inkhel tan tir lamah Neymar chuan clear chance tha tak neiin, a pet goal lova, first half-ah tho hian Neymar hian ti goal ngei ngei tura ngaih a hlah leh bawk.
PSG hian competitive match an khelh loh rei tawh avangin team tha an hmachhawn leh hmasak berah an talbuai teuh hle a, chance tam tak an hlah. Chutih laiin fitness-ah hrim hrim chuan Atalanta aiin an chungnung zawk zia inkhelh tawp lamah a lang chho ta. Serie A khel zo hlim Atalanta aiin PSG chu a tawp thlengin an viak a tha a, Mbappe rawn lut khan danglamna nasa tak a siam bawk.
Neymar hian chance tha tak tak vawi thum vel tal chu hlah mahse a khel erawh a chhe lo hle a, khelmual chhunga player tha ber a tih theih hial tho awm e. Atalanta lakah Brazilian forward hian take-ons 16 lai a nei a, hei hi tun season Champions League game khatah a tam ber a, chubakah foul vawi 9 hlawhchhuakin, tun Champions League season game khata foul hlawhchhuak hnem ber a ni bawk.
Atalanta hi an huaisena, hlauh nei lovin an khel; an tlarhnung pherh chang a awma, Neymar clinical zan nise chuan PSG hian goal li vel lai an khung belh theih a rinawm.
Darkar chanve khelh a nih hma hretin Pasalic chuan Atalanta hi hma a hruaipuia, box chhung veilam atangin a ke veilamin mawi em emin goal-ah ball a chhuih luta, tun season-a a goal 12-na a khung.
PSG hian chance ngah hle mahse Atalanta pawh counter-attack ah an hlauhawm thin hle a, striker tha tak kawl se chuan goal pawh an khung belh theih ngei a rinawm viau. Darkar chanve vel khelh tur a la awmin Mbappe dah luh a ni a, French forward hian eng emaw chenah inkhel a ti danglam tih theih a ni a, mahse ani pawh hian chance tha tak tak hlah a nei nual.
Atalanta hian hun tawp lam thleng hma an hruaia, PSG in an ti goal hleithei lo bawk nen Champions League an vawi khat khelhnaa semi final lut thei hmasa ber an ni dawn emaw tih hnuah Marquinhos chuan PSG si phurh a rawn sut; far post lamah Choupo-Moting chuan Neymar ball tha zet a pe, box chhung veilam atangin Neymar hian goal hmazawn lamah ball a pe phei ve leha, Marquinhos chuan goal-ah lo chan tirin, 1-1 a ni ta.
An si phurh an sut atanga second 149 hnuah PSG hian hma an hruai zuia, Neymar-a pass tha zet hmangin Mbappe chuan tha zetin bench atanga rawn lut Choupo-Moting ball a pe a, Cameroonian player Choupo-Moting hian goal-ah lo thunin, 2-1 in PSG in hnehna an changa, semi final-ah Atletico Madrid emaw RB Leipzig emaw an hmachhawn dawn a ni.
Atalanta 1-2 PSG
(Pasalic 26’) (Marquinhos 90’, Choupo-Moting 90+3’)
Player Ratings
Atalanta: Sportiello 7, Toloi 7, Caldara 6, Djimsiti 7, Hateboer 6, De Roon 7, Freuler 6, Gosens 6, Gomez 7, Pasalic 7, Zapata 7.. subs: Palomino 5, Castagne N/A, Muriel 5, Malinovskiy 5, Da Riva N/A.
PSG: Navas 6, Kehrer 6, Thiago Silva 6, Kimpembe 6, Bernat 7, Herrera 6, Marquinhos 7, Gueye 7, Neymar 8, Icardi 5, Sarabia 5.. subs: Rico N/A, Paredes 6, Draxler 5, Mbappe 8, Choupo-Moting 8.
