UEFA Champions League quarter final game hnihnaah German club RB Leipzig leh Spanish club Atletico Madrid te an inhmachhawna, Leipzig hian 2-1 in hnehna an changa, semi final an lut.
He inkhelah hian Leipzig tan Dani Olmo leh Tyler Adams-te chuan goal an khunga, Atletico Madrid tan hian Joao Felix chuan penalty spot atangin goal a khung ve bawk.
Leipzig hi kum 2009-a din chauh kha an ni a, regional league atanga rawn khel chho in, kum 11 a ral leh meuh chuan Champions League semi final an khel dawn.
Leipzig manager Julian Nagelsmann chuan Champions League-ah record thar a siam chhunzawm zela, kum 32 leh ni 231 a nih lai khan Champions League knock out stage thleng thei manager naupang ber a lo ni tawha, tunah hian kum 33 leh ni 21 niin manager zinga Champions League semi final thleng thei naupang ber record a siam leh ta bawk a ni.
Leipzig hian tun season-a che tha em em Timo Werner an nei tawh lova, German striker hian thla hmasa khan Leipzig chhuahsain Chelsea a zawma, Leipzig tan tun season khel zo law law lovin, Chelsea lama input luh nghal a thlang.
First halh hi second half aiin a hmuhnawm loh zawk a tih theiha, Atletico hian inkhel thunun deuh zawk mahse goal erawh a lut mai thei lova, chance pawh first half chhung hian team hnihte’n an insiam tam lem lo.
Second half tir lamah Leipzig hian hma an hruaia, Marcel Sabitzer-a cross tha zet chu Spaniard midfielder Olmo chuan goal-ah tauh lutin, Atletico goalkeeper Jan Oblak-a tan tih theih a awm lo. Olmo hian Leipzig tana a game 14-na chauh khelin, goal nga khung tling der.
Joao Felix chuan inkhel bul a tan lova, mahse second half-ah dah luh niin eng emaw chenah Atletico inkhel a rawn ti danglama, a khel chhe lo hle.
Inkhel a hmuhnawm chho hle a, Leipzig an khel tha zawka, Atletico hian an hneh lo a ni ber. Atletico hi vanneiin, 70mins-ah Joao Felix chuan penalty a hlawhchhuaka, a penalty hlawhchhuah hi goal-ah chan tir zuiin, Atletico si phurh a sut.
Hun tawp dawn thleng 1-1 a ni a, team hnihte hian Extra Time an khelh chhoh mai a rinawm hman. 88mins-ah Sabitzer chuan veilamah fullback Angelino chu ball a pe a, Angelino hian Adams pe in, Adams hian goal-ah shoot zuia, Atletico defender Stefan Savic a fuh, goal-ah ball lut zuiin, Adams hian Leipzig chakna goal a khung. Adams hi American player Champions League quarter final-a goal khung thei hmasa ber a ni.
Ti hian Leipzig hian semi final-ah Atalanta hneh tur Paris Saint-Germain an hmachhawn dawn a ni.
RB Leipzig 2-1 Atletico Madrid
(Olmo 50’, Adams 88’) (Felix 71’pen)
Player Ratings
RB Leipzig: Gulacsi 7, Angelino 7, Upamecano 8, Halstenberg 6, Laimer 6, Nkunku 6, Kampl 6, Sabitzer 7, Olmo 7, Poulsen 6, Klostermann 6. Subs: Adams 7, Haidara 6, Schick 6, Mukiele 6.
Atletico Madrid: Oblak 6, Lodi 6, Gimenez 6, Savic 6, Trippier 6, Saul 5, Koke 6, Carrasco 7, Herrera 5, Llorente 5, Costa 6. Subs: Felix 7, Morata 6, Felipe 6.