UEFA Champions League knock-out stage chu zanin zanlai (19/2/2020 zingkar) atang hian khelh tan a ni leh dawn ta a, KO stage inkhel hmasa ber tur zingah champion lai Liverpool an tel dawn.

Round of 16-ah hian English club pali Liverpool, Chelsea, Manchester City leh Tottenham-te an la dam veka, Spain lam atang Barcelona, Real Madrid, Atletico Madrid leh Valencia te an la dam vek bawka, Italy lam atangin Juventus, Napoli leh Atalanta-te an la dam bawka, Germany lam aiawh Bayern Munich, Borussia Dortmund leh RB Leipzig-te pawh an la awma, France lam atangin Paris Saint-Germain leh Lyon-te an awm bawk a ni.

Zanin zanlai dar 1:30-ah hian Atletico Madrid chuan Wanda Metropolitano Stadium-ah champion lai Liverpool an lo mikhual dawna, Dortmund chuan Westfalenstadion-ah French heavyweight PSG an lo mikhual dawn bawk.

Naktuk zanlai (20/2/2020 zingkar) ah pawh inkhel a awm dawna, 1:30am –ah Atalanta chuan San Siro-ah Valencia an lo mikhual dawna, Atalanta hian an stadium an sak that mek avangin AC Milan leh Inter Milan home ground San Siro chu Champions League lamah an hmang hawh rih. Naktuk zanlai hian Tottenham chuan Tottenham Hotspur Stadium-ah RB Leipzig an lo mikhual bawk ang.

Kar leh lamah Round of 16 first leg hi khelh zawh a ni dawna, Chelsea chuan Stamford Bridge-ah Bayern Munich an lo mikhual dawna, Napoli chuan Stadio San Paolo-ah Barcelona an lo mikhua bawk dawna, Lyon chuan Parc Olympique Lyonnais-ah Juventus lo mikhual dawnin, Real Madrid chuan Santiago Bernabeu-ah English champions Manchester City an mikhual bawk anga, inkhel te hi 1:30am a khelh vek tur an ni.

Second leg hi March thla ni 10 zanlai (ni 11 zingkar) a khelh tan tur a ni dawn a ni.