Zanin dar 11:15 hian Manchester United chuan Champions League Group A match-ah Galatasaray an tlawh dawn, he match hi United tan chuan a pawimawh dawn khawp mai, an chak lo a nih chuan tun season UCL atangin an tla dawn.

Group A-ah hian Bayern Munich chuan point 12 neiin hma an hruai a, anni hi Knock Out stage an lut chiang tawh. Copenhagen leh Galatasaray te chuan point 4 ve ve an nei a, Manchester United hian point 3 neiin a mawng ber an ni mek.

Copenhagen, Galatasaray leh Manchester United te hian pahnihna nih an inchuh dawn a, khelh hnih chiah a awm tawh, knock out stage luh an duh a nih chuan an khelh hmabak pahnihah hian an chetchhiat a thiang tawh dawn lo a ni.

Tun season tantir zet chu inhliamin United a tibuai ve nasa hle, November thla tawpah chuan player hliam thenkhat an lo kir leh nual tawh hlawm a, Luke Shaw pawh a dam tawh a, Everton a hmachhawn nghal a nih kha.

Rasmus Hojlund leh Antony te khan inhliam avangin Everton an hmachhawn thei lo a, mahse anni pahnih hi Istanbul-a Galatasaray hmachhawn turin Erik ten Hag chuan a hruai ve leh ta.

Tun season Champions League-a goal 5 khung tawh Hojlund hi Luton an hmachhawn tum khan a inhliam a, ram tan pawh a fehchhuak thei lo, mahse Galatasaray hmachhawn turin a lo kir leh ta e.

Antony pawh hliam tenau a nei a, Everton a hmachhawn thei lo, mahse anni pahnih hian United training tha takin an zawm tawh a, Istanbul-ah inkhelh bul tan turin an fit tha tih Erik ten Hag chuan a sawi.

Galatasaray hmachhawn tur United squad :

Goalkeepers: Altay Bayindir, Tom Heaton, Andre Onana

Defenders: Diogo Dalot, Victor Lindelof, Harry Maguire, Sergio Reguilon, Luke Shaw, Raphael Varane, Aaron Wan-Bissaka

Midfielders: Sofyan Amrabat, Bruno Fernandes, Dan Gore, Hannibal, Kobbie Mainoo, Scott McTominay

Forwards: Antony, Alejandro Garnacho, Rasmus Hojlund, Joe Hugill, Anthony Martial, Facundo Pellistri