Real Madrid manager Carlo Ancelotti chuan, Champions League group stage-ah winner nih thuai a, La Liga lama rilru zawng zawng pek an duh thu a sawi.

Real Madrid hian nizan khan UEFA Champions League group stage inkhelah Shakhtar Donestsk chu 2-1 in an hneh a, an khelh tawh chinah Los Blancos hi an la chak vek. He inkhelah hian Real tan Rodrygo leh Vinicius Junior te chuan goal an thun a, Shakhtar tan hian Oleksandr Zubkov chuan goal a thun bawk.

Khelh thum khelh tawhah Real Madrid hian Group F-ah hma an hruai a, point 9 an hlawhchhuak tawh. Shakhtar hi pahnihnaah awmin, anni hian point 4 an nei a, pathumnaa awm RB Leipzig chuan point 3 an nei. Palinaah Scottish champions Celtic an awm a, Celtic hian point 1 chiah an la hlawhchhuak a ni.

Shakhtar laka hnehna an chan zawhah, Italian manager Ancelotti chuan, “Kan khel tha in ka hria a, chuvang chuan ka lung pawh a awi viau. Kan tlarhma pathum te khan an nawr na a, an inman em em bawk. Chance kan ngah em em a, mahse goal-ah kan chantir thei hlawm lova, mahse chance neih hi a pawimawh hle.

“Si hnih faia hma kan hruai hnu khan game kan timuang a, kan nuamsa viauin kan hria. Mahse half time-ah rilru pe turin player te ka fuih a, a chhan chu game kha danglam thei a la ni. Tiang hi thil awm thei a ni a, game hlauhawm a ni a, kan khel tha viaua kan inhriat lai hian thil thleng thut thei a ni.

“He group hi kalsan thuai thuai kan duh a, a chhan chu league lamah rilru zawng zawng kan pe thei dawn a ni,” tiin a sawi.

Real Madrid midfielder Toni Kroos pawhin, an group kalsan thuai an tum thu sawiin, “Group hi zawh fel thuai kan tum a, game thum tha takin kan khel tawha, point 9 kan nei mek a, Warsaw-ah vawi khat chak leh kan ngai.

“Chance kan ngah em em a, mahse goal-a ball a luh theih loh ni hi a awm ve hrim hrim a, 7-1 vel laia chak thei kan niin ka hria. A tawpah erawh point 3 kan hlawhchhuak a, chak kha kan phu em em bawk. 2-1 chiahin chak ta mah ila, hetiang a nih tum hi a awm thin a, goal kan khung theih chhoh zel ka ring,” a ti ve bawk.