Tottenham player hlui David Ginola chuan season hmasaa Tottenham-in UEFA Champions League final an lut kha, Tottenham tlakchhiat chhoh tan chhan hi a nih thu a sawi.

Tottenham hi season liamta khan player thar lak luh nan duli pawh hmang lovin Champions League final an luta, final-ah English club tho Liverpool hmachhawnin, Tottenham hi tlawm zawkah an tang.

Hetih hun laia Spurs manager hi Mauricio Pochettino a ni a, mahse tun season chanve khelh a nih hma deuh khan Spurs hi an chet that tawk loh avangin Pochettino hi ban a ni.

Tottenham tana game 100 chuang lo khel tawh thin kum 53 mi French pachal, kum 1999 Premier League Footballer of the Year lawmman dawng tu Ginola chuan, “Season hmasaa Tottenham-in Champions League final an khel kha an tana thil pawi tawpkhawk nin ka hria a, fan-te leh club tan thil ropui tak chu ni mahse an la tlin loh stage-ah an inkhel.

“Club dang heti ang stage-a kum tin khel thin an awm laiin Tottenham an rawn lang thuta, final-ah Liverpool an rawn hmachhawn; khati ang stage-a khelh kha chuan mi te en bik an ni zuia, miin thil ropui tak tak an lak atangin an beisei phah bawk.

“Tottenham hian trophy an la hleithei lova, chu chu Pochettino-a tana buaina lian ber pawh kha a ni a, Pochettino-a tan a pawi ka ti a, a chhan chu hna tha tak Spurs ah khan thawk mahse trophy an lak loh avangin vui tawk an awm reng.

“An che tha thawkhata mahse trophy chu an la lem lo. Champions League final an rawn khela, mahse khata tang khan hnehna an chan zui theih loh chuan a hma aia nasa in sawisel zui an ni lo thei lova, a hma kum lawka Champions League final khel lakah chuan beiseina a sang lo thei lova, tun season-ah top 10-a awm tur pawhin an beih fe a ngai dawn.

“Hei hi an buaina lian ber niin ka hria a, Champions League final kha an thleng hma mah mahin ka hria. Ram pawn lama vah chhuaha trophy lak hma hian mahni rama hlawhtlin phawt hi a ngai reng a ni,” a ti.