UEFA Champions League quarter final inkhel pathumnaah Bundesliga champion Bayern Munich chuan Catalan club Barcelona chu 8-2 zetin an lo hneha, German club ropui hian semi final an luta, semi final-ah Manchester City emaw Lyon emaw an hmachhawn ang.
Bayern tan hian Thomas Muller leh Barca player loan-a an kawl mek Philippe Coutinho te chuan goal hnih ve ve an khung bakah, Ivan Perisic, Serge Gnabry, Joshua Kimmich leh Robert Lewandowski te chuan goal khat theuh an khung bawk. Barca tan hian Luis Suarez chuan goal khungin, Bayern defender David Alaba chu a own-goal bawk.
Barcelona boss Quequi Setien-a dinhmun a derthawng zual zela, Barca hian tun Sunday ral hma ngeiin an ban ngei a rinawm ta hle.
Bayern hian 4-2-3-1 formation an rawn hmanga, captain Manuel Neuer chuan si ban nghakin, defence-ah Kimmich, Alaba, Boateng leh Alphonso Davies-te an intlar. Midfielder-ah Leon Goretzka leh Thiago Alacantara awmin, wing-ah Gnabry leh Perisic te an awma, tlar hmaah Lewandowski maltlat in, a hnung chiahah Muller a awm.
Barca hian an formation thlakin 4-4-2 ang deuhin an rawn khela, an ti fuh lo hle. Marc-Ander ter Stegen chuan si ban nghakin, Nelson Semedo, Gerard Pique, Clement Lenglet leh Jordi Alba te chu defence-a dah an ni. Defence hmaah Frenkie de Jong, Sergio Busquets, Arturo Vidal leh Sergi Roberto te awmin, tlar hmaah Suarez leh Lionel Messi te an awm.
Inkhela an tana, a hmuhnawm nghal par par hle. Team hnihte an innawrin, an inngam tawn hle a, a tir 10mins chhung ringawtin goal hnih a luh hman bakah chance tha tak tak hlah an nei nghal.
Inkhel tan atanga 4mins-ah Bayern in hma an hruaia, veilam atanga ball lo kal chu Muller chuan lo changing, box chhung a hmalama awm Lewandowski a pe a, Lewandowshi hian rawn tlan lut Muller atan bawk ball lo siamsak lehin, Muller hian goal a khung zuia, Bayern in hma an hruai.
Minute thum hnuah Barca in an si phurh an sut nghala, veilamah Bayern midfielder hlui Alba chuan ball chak taka khalhin, Bayern box chhungah ball a khalh lut, a thlanga awm Suarez chu pek tumin hniam teah ball a pe thla a, Bayern defender Alaba chuan lo clear tum mahse a tum angin a pet lova, goal-ah lutin, Neuer-a’n a ban pha lo.
An si phurh an sut hnuah Barca hian goal khung belhna hun tha tak tak an nei zuia, Suarez chuan box chhungah through ball tha tak um lutin, Neuer chu pet khum tum mahse Neuer hian a lo save. Hemi hnu lawk hian dinglam atangin Lionel Messi chuan box chhungah hlauhawm takin ball a vawrh lut, changtu nei mumal lovin Barca player eng emaw zat awm mahse tu mahin ball an khawih lova, ball hian si ban a per zui.
Inkhel a hmuhnawma, a tir lamah team hnihte hian attacking football hmuhnawm tak an chhawpchhuak ve ve a, an defence line a san dun viau avangin an mawng a pawp titih thin.
20mins chuang hret khelh a nihin Bayern in hma an hruai leha, Barca chuan an half ah ho angreng takin ball an hloh; Serge Gnabry chuan Barca box lam panin ball a khalh nghala, a thlanga inpawt Perisic a pe. Perisic hian box chhung veilamah ball khalhin, angle tight tak atangin goal-ah a shoot a, Ter Stegen chuan a ke in ball lo khawih mahse a dang chhuak zo lova, 2-1 in Bayern in hma an hruai.
Bayern an chungnung zawka, Barca a bet zawkah an tanga, mahse chance erawh an insiam fo tho. Team hnihte atangin chance a awm zung zung reng tih theih a ni a, game a rangin mit a tlai hle a tih theih awm e.
Darkar chanve khelh a nih hma deuhin Bayern hian goal an khung belha, midfield atangin Thiago chuan Goretzka ball a pe a, Goretzka hian ball a chanve velah Gnabry-a chu ball nalh takin a pe leh nghal, Gnabry hian box chhung dinglam hret atangin goal-ah a khunga, 3-1 a ni.
Bayern hian an goal thumna an khung hnu lawk hian goal dang khung lehna chance tha tak an nei a, Ter Stegen chuan ball a sem chhuak suala, Lewandowski chuan ball changin, goal khung tum mahse Ter Stegen chuan a lo save hram.
Darkar chanve khelh a ni a, team hlauhawm zawk Bayern hian goal an khung belh leh ta nge nge a, box dinglam pawn chiah atanga Joshua Kimmich-a ball cross chu Muller chuan chiang takin goal-ah a lo tlawh luta, Bayern goal lina a khung. Bayern hian inkhel an thunun chhoh em avangin a tir lama inkhel hmuhnawm a bo deuha, Barca lam an beh tak em avangin chak team hnihte an intum tawk lo chho hle.
4-1 in first half a tawpa, second half-ah Barca manager Quequi Setien chuan Sergi Roberto lachhuakin, Antoine Griezmann a dah lut. First half an gem em in second half a rang lova, chance pawh a tam em em lo.
Bayern hian inkhel thunu hle in, an khel a dik hle a, Barcelona erawh an defence a fuh lova, an khel chhe tlanga, an thiampuipa Messi-a tan pawh tih ngaihna thlawt a awm lo a ni ber.
Darkar khat khelh a nih hma lawkin Barcelona-in goal an khunga, veilamah tha em em in Alba chu long ball pek a ni a, Alba hian Bayern box pawn chiaha awm Suarez a pe ve leha, Suarez hian box chhungah ball khalhin, a fake-a chiang takin Jerome Boateng a bum; Boateng a bum zawhah chuhtu nei tawh lovin, Suarez hian goal a khung zuia, 4-2 a ni.
Darkar khat chuang hret khelh a nihin Bayern hian an goal ngana an khunga, veilamah Alphonso Davies chuan ball khalhin, Nelson Semedo a chhaih kuala, Semedo bum tlangin veilam atangin box chhungah ball a khalh luta, goal hmazawnah pe pheiin, Kimmich chuan goal-ah a lo chantira, Bayern fullback pahnih an thawkdun tha hle a, Davies-a thawh that rah liau liau a ni.
Bayern hian goal khungna hunt ha an insiam leh nghala, mahse bench atanga rawn lut Kingsley Coman chuan goal-ah a chantir thei lo. Bayern hian chance na ngah hle a, mahse Barca hian an dang ve leh thei hram thin.
80mins khelh chhoh a ni a, Bayern bawk chuan goal an khung leh; Bayern-in Barca player loan-a an kawl mek Philippe Coutinho chuan box chhung veilam atangin goal hmazawnah ball a pe pheia, Lewandowski chuan chiang em emin goal-ah a lo tauh lut. VAR lam chuan Lewandowski hi a offside leh offside loh rei tak an en hnuah Polish striker hi a on-side a, goal hi sut a ni lo.
Barca mualpho a zual zela, goal an chhuah zui lehnghala, Bayern goal sarihna khungtu hi Barcelona player Coutinho a ni; Muller chuan Barca box pawn deuh chiahah ball changing, box chhung veilama awm Coutinho a pe a, Coutinho hian goal-ah a lo khung.
90mins khelh a nih hma chiahin Bayern loanee Coutinho bawk chuan ball a khung lehnghala, mahse Brazilian playmaker hian a club dik tak Barca laka a goal thun hi a lawm duh lova, 8-2 laiin Bayern hian hma an hruai. Goal luh belh awm tawh lovin inkhel a tawpa, Bayern hi Champions League-ah Barca laka goal 6 khung tling thei awmchhun an ni.
Barcelona 2-8 Bayern Munich
(Alaba 7’OG, Suarez 57’) (Muller 4’, 31’, Perisic 21’, Gnabry 27’, Kimmich 63’, Lewandowski 82’, Coutinho 85’, 89’)
Player Ratings
Barcelona: ter Stegen 5; Semedo 4, Pique 4, Lenglet 6, Alba 6; Busquets 5; Roberto 5, Vidal 6, De Jong 5; Messi 5, Suarez 6 SUBS: Fati 6, Griezmann 6
Bayern Munich: Neuer 6; Kimmich 8, Boateng 6, Alaba 7, Davies 7; Thiago 7, Goretzka 8; Perisic 7, Muller 9, Gnabry 8; Lewandowski 7 SUBS: Coutinho 8, Tolisso 6, Hernandez 6, Coman 7, Sule 6
