Zanin zanlaiah UEFA Champions League quarter final game thumna khelh a ni dawna, Spanish club ropui Barcelona leh German club ropui ber Bayern Munich an inhmachhawn dawn.

India sanaah chuan zanin zanlai dar 12:30-ah Barca leh Bayern te hi an inhmachhawn dawna, Portugal khawpui Lisbon-a Estadio da Luz-ah an inkhel dawn.

Barcelona hian quarter final lut tur hian round of 16-ah Napoli chu aggregate-ah 4-2 in an hneha, Bayern ve thung hian round of 16-ah Chelsea chu aggregate-ah 7-1 in an hneh bawka, quarter final hi an lut.

Barca leh Bayern te hian Champions League quarter final hi an vawi 18 thlenna ve ve a ni a, anni aia Champions League quarter final lut ngun an awm lo.

Barcelona hi ti hian zawnin season 13 chhung ngawt quarter final an lut ta a, kum 2007-08 season atang khan kum tin quarter final la lutin, Champions League-a quarter final lut zawn rei thei ber nihna an hauh mek.

Champions League-a Barca leh Bayern intum hnuhnun ber hi 2014-15 season kha a ni a, hemi tum hian semi final atangin Barca hian Bayern hi an pet chhuak. Bayern hi Champions League-a Barca hneh loh ngun ber an ni a, vawi 8 an inhmachhawn tawhah Barca hi vawi nga lai a tlawm zawkah an tang.

Team hnihte hi Champions League-a champion tawh dam la awm chhun pahnih an ni a, champion tura rinkai ber pahnih ni mekin, a chak zawk zawkin semi final ah Manchester City emaw Lyon emaw an hmachhawn dawn a ni.

Team News:

Barcelona tan hian French defender Samuel Umtiti chu a inhliam avangin a khel thei dawn lova, Ousmane Dembele erawh training a zawm leh tawha, khel thei tura ngaih niin inkhel bul erawh a tan thei lo maithei.

Bayern tan Benjamin Pavard chu a inhliam avangin a khel thei dawn lova, tun hnaia hliamin a tlakbuak Jerome Boateng leh Kingsley Coman te erawh an dam tawh. Barcelona atanga loan-a an kawl Philippe Coutinho chu a club Barcelona lakah a khel thei dawna, mahse bench lama a awm phawt a rinawm a ni.