Champions League semi-final first-leg inkhelah Barcelona leh Liverpool-te chu mi nuai khat dawn lenna Camp Nou-ah an inhmachhawna, mual neitu lam Barcelona hi si thum faiin an chak. Barcelona tan hian Liverpool player hlui Luis Suarez chuan goal khat a khunga, captain Lionel Messi chuan goal hnih a khung bawk.
Liverpool chuan second-leg ah Barcelona chu si thum phur sa leh away goal nei lovin an lo mikhual dawn a, Liverpool hian a tlem berah goal li tal an thun ngei ngei a ngai dawn. Anfield-ah Liverpool hian goal khat pawh an chhuah chuan goal nga tal an khung a ngai dawn tihna a ni a, an chan a chau hle.
Inkhel a hmuhnawm a, first half-ah Barcelona khel tha zawkin second half-ah erawh Liverpool an kheltha viau thung. Mahse an goal hnihna an chhuah hnuin Liverpool an khel hleithei tawh lo a ni ber a, Barcelona hi vannei deuh se chuan goal dang pawh khung belh thei an ni. Liverpool pawh an vanduai a, si ban chiang takin an pet per ve bawk.
Liverpool hmatawng pahnih Mohamed Salah leh Sadio Mane-te an hriam tawk lo em em a, Salah hian inkhel bul tan tha thawkhat viau mahse nidang a ang zui lem lo.
Statistics-ah team hnihte an inthlau lo hle a, an intumtawk viau a, mahse a pawimawh ber goal thun lamah erawh Barcelona an chungnung daih zawk.
Barcelona 3-0 Liverpool
(Suarez 26’, Messi 75’, 82’)
Player Ratings-
BARCELONA:Ter Stegen 8, Sergi Roberto 7, Pique 7, Lenglet 7, Jordi Alba 8, Busquets 7, Rakitic 8, Arturo Vidal 7, Coutinho 6, Suarez 8, Messi 9. Subs: Semedo 7, Alena n/a, Dembele n/a.
LIVERPOOL: Alisson 6, Gomez 6, Matip 6, Van Dijk 6, Robertson 7, Fabinho 6, Wijnaldum 6, Keita 6, Milner 6, Salah 7, Mane 6. Subs: Henderson 6, Firmino 6, Origi n/a.
Match Report
Inkhel tan a ni a, minute thum khelh a nihin Barca lamin chance tha em em an nei nghala, mual veilam atangin Liverpool an nawr, Coutinho leh Rakitic ball an inpe a, Rakitic hian Liverpool defence hnungah ball changin goal-ah a pet mai dawn emaw tih hnuah goal hmazawna awm Vidal pek a tuma, Liverpool lamin an dang chat.
Minute sawm chuang hret khelh a nihin Barca in chance tha tak an nei leh a, Alba chuan veilam atangin Liverpool box chhungah ball a khalh lut, goal hmazawna awm Messi a pe, Messi hian lo pet tum mahse Liverpool defender ten an tibuai hman. Hetah hian Matip chuan a kut hmawrin ball a khawih deuh niin a langa, Barca lamin penalty hmuh inbeisei viau mahse referee chuan penalty pekna tlakah a ngai lo.
Liverpool lamin Barca an nawr let ve nghal, Salah chuan chak takin ball khalh phei mahse hlauhawm lutukah a chhuak lo. Minute sawmhnih khelh a nih hma deuhin Liverpool midfielder Keita a inhliama, khelmual chhungah minute thum bawr vel buaipui a nih hnuah lakchhuah niin a aiah captain Jordan Henderson dah luh a ni.
26mins-ah mual neitu lam Barcelona in hma an hruaia, Liverpool box pawn veilama awm Coutinho chu ball pek niin, Coutinho hian a hnunga awm Alba a pe ve leh, Alba hian lei hrulah nalh em emin Liverpool box chhungah ball a pe a, Suarez chu Liverpool defence kar atanga rawn pit zawtin ball chu goal-ah a tlawh luta, tun season-a a Champions League goal hmasa ber khungin Barcelona hma a hruaipui.
Darkar chanve chuang khelh a nihin Liverpool an si phurh sutna hun tha tak an nei a, mual dinglam atangin Barca box chhunga tlan lut Mane chu ball tha tak pek a ni, Mane hian ball a hmuh chu lo tlawh mahse duh angin a tlawh fuh lova, goal a thlawh khum. Hemi hnu deuh lawk hian Milner chuan box pawn atangin Barca goal-ah ball a peta, goal erawh a zawn lem lo.
Liverpool hi khel chhe lutuk lo mahse Barcelona an khel tha zawka, inkhel pawh an thunun zawk a tih theih. Liverpool an hlauhawm lutuk lo, Barca erawh an hlauhawm thin a, mahse goal khung thei awm tawh loviin 1-0 in first half tihtawp a ni.
Second half tan a ni a, Liverpool lam an hlauhawm nghal; Salah chuan Barca box chhungah ball chawkin a piaha awm Wijnaldum a pe, Wijnaldum hian box chhung veilama awm Milner a pe ve leha, Milner hian goal-ah shoot mahse Stegen chuan tha takin a lo save. Minute sawmnga chuang hret khelh a nihin Salah chuan Barca box pawn atangin goal-ah ball a shoot a, shoot chhe lem lo mahse Stegen bawk chuan a lo save leh.
Darkar khat khelh a nih hma deuhin Barca box pawn dinglamah Salah chu ball pek a ni a, Salah hian box chhungah a cut lut, goal hmazawn lamah ball pe pheiin, Milner chuan kawh takin goal-ah pet mahse Stegen chuan a lo man. Second half-ah Liverpool an khel tha a, hlauhawm pawh an hlauhawm thin viau, mahse goal an khung thei tlat lo.
Barcelona hi bet zawk mahse 75mins-ah goal an khung belha, Messi chuan a ama thawhrah liau liau a seng; Messi chuan ball khalhin Liverpool-in an chhuhsak hleithei lo, box chhunga awm Roberto chu Messi hian pe mahse Robertson chuan a lo khawiha, box chhung veilama awm Suarez chuan changin goal-ah pet mahse goal bar a per a, hemi rawn let Messi chuan goal-ah a lo chan tir.
Goal an khung belh hnuah Barca game a dik chho leh tan, minute sawmriat chuang hret khelh a nihin Barca hian freekick an hmu, freekick atang hian Messi chuan mawi takin a chhuih luta Barcelona in 3-0 in hma an hruai. Hemi hnu lawk hian Liverpool lamin a zawnin chance tha tak an nei ve nghala, chance hmasa zawk hi goal line –ah Barca defence chuan an lo pet chhuak, hemi hi Salah chuan goal-ah pet leh mahse si ban a pera Liverpool an vanduaiin Barca an vannei hle.
Injury time-ah Liverpool in corner an hmu, corner atanga an ball vawrh luh chu Stegen chuan a lo man a, ani hian Messi pe in Barca-in Liverpool an nawr let nghala, Messi chuan ball tlanpuiin a veilama tlam Suarez a pe, mahse hlauhawmah an chhuah lo. Hemi hnu deuh lawk hian Barcelona in Liverpool an nawr leh Rakitic chuan ball khalhin box chhung dinglama awm Ousmane Dembele chu ball a pe, Dembele hi insiamremin goal-shoot mahse goal a pet khum.
Hun a tawp tep tihah Barcelona bawk chuan goal khung ngei ngeina tur chance an insiam leha, box chhung veilam hreta tlan Messi chu ball pek a ni, Messi hian Dembele pe ve lehin Dembele hmaah Alisson bak a awm tawh lo, Barcelona goal lina a khung ngei dawn emaw tih hnuah Dembele hian a pet chhe hle a, Alisson chuan lo manin, hemi hnu deuh lawk hian inkhel tihtawp zui a ni a, Barcelona chu 3-0 in an chak ta a ni.