Champions League Quarter-final second-leg inkhel hmuhnawm em em ah Manchester City chuan Tottenham chu Etihad Stadium-ah an lo mikhuala, City hi 4-3 in chak mahse aggregate-ah erawh 4-4 a ni a, Tottenham hian hian away goal an neih avangin Tottenham chu away goal rule hmangin semi-final an inpet tling. Tottenham hian semi-final ah champion lai Real Madrid pet tla tu Ajax an hmachhawn dawn.
Inkhel hmuhnawm tak a nih mai bakah Champions League inkhelah chuan a ‘dramatic’ ber zinga mi a ni chiang hle. City tan hian Raheem Sterling chuan goal hnih a khung bakah Bernardo Silva leh Sergio Aguero-te chuan goal khat ve ve an khung bawka, Tottenham tan Son Heung-min chuan goal hnih khungin Fernando Llorente chuan goal khat a khung bawk.
First leg-ah Tottenham hi si khat faiin an mualah an chak a, City hian away goal an thun lova an tlak phah; Champions League-a away goal neih pawimawh zia leh away goal neih loh pawi zia a lang nawn leh.
Manchester City 4-3 Tottenham (agg 4-4)
(Sterling 4’, 21’, B.Silva 11’, Aguero 59’) (Son 7’, 10’, Llorente 73’)
Player Ratings
Manchester City: Ederson 5, Walker 6, Kompany 5, Laporte 6, Mendy 5, Gundogan 6, Silva 5, De Bruyne 9, Bernardo 7, Aguero 7, Sterling 8. Subs: Fernandinho 6, Sane 6.
Tottenham Hotspur: Lloris 6, Trippier 5, Alderweireld 7, Vertonghen 5, Rose 6, Wanyama 5, Sissoko 6, Alli 6, Eriksen 6, Moura 6, Son 8. Subs: Llorente 7, Davies 6, Sanchez 6.
Match Report
Inkhel tan a ni a, Manchester City-in hma an hruai nghal; De Bruyne chuan ball khalhin, veilam rawn tlan Sterling a pe, Sterling hian box chhungah ball lalutin far post lamah a pet zuia a goal mawi hle. Tottenham lam an zam bik lova, City an chhanglet ve nghal; box pawn deuh chiah atangin South Korean player lar Son chuan City goal-ah a pet a, Ederson chuan lo khawih mahse a goal tho a, 1-1 a ni.
Tottenham in minute thum hnuah goal an khung lehnghala, mual dinglam atangin Laporte chu ball pek a ni, Laporte hian ball a dawn chu khawih na lutukin a umpha leh si lova, Moura chuan rawn chhuhsakin Brazilian winger hian ball chu City goal lam panin a khalh a, box pawn deuh chiahah Eriksen a pe, Eriksen hian a thlang rawn inpawt Son chu a pe ve leh, Son hian box chhung deuh chiah atangin City goal far post top corner-ah ball a chhuih luta, Tottenham hma a hruai pui.
Tottenham goal khung hnu chiahah City lamin goal an khung ve leh nghala, Aguero chuan Spurs box pawn deuh chiahah ball changin box chhung dinglama awm Bernardo a pe, Bernardo hian a ke veilamin Spurs goal-ah ball a pet, Rose chuan lo khawih perin Lloris-a tan tihtheih a awm lova, goal-ah a lut, 2-2 a nia, inkhel tan atanga minute 11 chhung goal li lai a lut der.
Minute sawmhnih khelh a nih hma deuhin Wanyama chuan an box pawnah Walker a ti tlu a, City lamin freekick an hlawhchhuak; Freekick hi David Silva chuan petin, far post lamah chhuih luh a tum a, mahse a sang hreta Lloris a ti buai lo. Minute sawmhnih khelh a ni a, City in goal an khung leh; Bernardo chuan Spurs box pawn dinglamah ball khalhin a bula rawn inpawt De Bruyne chu ball a pe, Belgian playermaker hian lei hrulah ball cross in, far post bula awm Sterling chuan De Bruyne cross hi goal-ah lo chantirin 3-2 in mual neitu lamin hma an hruaia, minute sawmhnih chhung velin goal nga a lut.
Half time hma deuh lawkin Son chu veilamah ball pek a ni a, City box chhung veilamah ball luh puiin a ke veilamin far post lamah ball a pet, a goal teuh hle a, goal a zawn lo hret tih mai chauh a ni. Hemi hnu deuh lawk hian De Bruyne chuan Spurs box pawn atangin a ke veilamin ball a pet ve leha, lei hrulah petin Lloris chuan harsa lem lo takin a lo save. First half-ah goal a luh belh tawh lova, 3-2 in tihtawp a ni.
Second half tan a ni a, City-in freekick an hlawhchhuak nghal; Son chuan De Bruyne ball khalh lai a man beh tlat avangin referee chuan City hi freekick a pe, Son chu yellow card pek ni bawkin semi-final first leg a awl a ngai dawn. Freekick atang hian De Bruyne chuan ball na taka petin goal a thlawh khuma, a thlawh khumna erawh a tam lo. Hemi hnu deuh lawk hian Lloris chuan Sterling-a ball pet a lo save a, second half-ah minute sawm pawh khelh a nih hma in De Bruyne ball pet tha tak chu Lloris chuan tha zetin a save leh bawk.
Second half-ah minute sawm vel chiah khelh a nihin City chuan mual dinglamah freekick an hlawhchhuak a, Gundogan chuan freekick atang hian Spurs box chhungah ball a vawrh lut, David Silva chuan lo tauh mahse a hlauhawm lem lo. Hemi hnu lawk hian Fernando Llorente chuan chance tha em em mai a hmu a, box chhungah awmin a tan rem takin ball vawrh luh a ni a, Llorente hian lo tauh che hle in Ederson chuan a save.
Darkar khat khelh a nih hma hretin City-in an goal lina an khung a, De Bruyne chuan ball tlanpuiin, box chhunga inpawt Aguero tan ball tha tak a pe, box chhung dinglam deuh atangin Aguero hian kawh takin Spurs goal-ah a pet luta 4-2 in City in hma an hruai. Aggregate-ah City hian hma a hruai chiah hian City manager Pep Guardiola chuan khel tha lem lo tak David Silva la chhuakin defensive midfielder Fernandinho a dah lut nghal bawk.
70mins khelh a ni chho va, City in inkhel thunun viau mahse Spurs in corner an hmu a, right corner atanga ball vawrh luh chu City goalkeeper Ederson chuan kawhin veilamah Spurs hian corner an hmu leh; corner atang hian ball vawrh luh leh niin Llorente chuan a lo khawiha goal-ah a lut. Llorent hian a khelin ball hi a khawiha, ball in a khel a fuh hma chiah hian a ban a fuh niin a lang, referee chuan uluk taka VAR-a a endik hnuah goal-a pawm a ni a, aggregate-ah 4-4 niin away goal rule hmangin Spurs hi an tlang thei.
Hun a tam tawh lo, City in goal an khung ngei ngei a ngaia, an goal nawr pawh a na chho zual. Minute sawmriat khelh a nih hma chiahin mual dinglam atangin City chuan Spurs box chhungah ball an vawrh lut, Aguero chuan lo tauhin goal a tauh khum. 85mins khelh a nihin Fernandinho chuan Spurs box chhung veilama awm Leroy Sane chu ball a pe, Sane hian lo tauhin Gundogan a pet ve leh, Gundogan hian goal-ah pet nghal mahse a pet sang mah mah a, hluahawm a ni lo.
Injury time-ah City in an chakna goal an khung emaw an ti a, Aguero pass atangin Sterling chuan goal a khung; City hi lawmin an au mahse goal build-up ah Aguero chu a offside avangin VAR chuan goal hi a sut a, City lawmna a va titawp chiang em! City hian theihtawpin Spurs hi nawr zui mahse goal an thun thei tawh lova, inkhel hi 4-3 a tawpin aggregate-ah 4-4 a ni a, Tottenham chu away-goal rule hmangin an tlanga, player thar lakluh nei lovin Champions League semi-final an lut.
