​UCL: Atalanta vs PSG thlirlawkna

13th August 2020, 02:08AM

Zanin zanlai hian UEFA Champions League quarter final khelh tan a ni dawna, inkhel hmasa ber tur te hi Italian club Atalanta leh French heavyweight Paris Saint-Germain te an ni.

India Standard Time (IST)-ah chuan zanin zanlai dar 12:30-ah Atalanta leh PSG-te hi an inhmachhawn dawna, kum dang ang lovin first leg leh secong leg awm dawn lovin, Portugal khawpui Lisbon-a Estadio da Luz-ah an inkhel anga, a chak lo zawk zawk an tla nghal ang.

PSG hi club lian an ni sa a, Ligue 1 champion lai niin, Atalanta erawh tun hnaiah rawn che tha chho an ni. Atalanta hi an chet thatna la rei lo hle mahse an theuneu hauh lova, Europe-ah chuan an inkhel aia hmuhnawm hi a tam bik lova, goal pawh an khung thei hle.

Atalanta leh PSG te hi an la inhmachhawn ngai lova, Atalanta hian an club chanchinah vawi khat chiah French club la hmachhawnin, Lyon nen kum 2017-18 season khan Europa League lamah an lo inhmachhawn tawh.

PSG hi Champions League inkhelah vawi khat mah Italian club lakah an la chak ngai lova, vawi 2 tlawm tawhin vawi 4 an draw tawha, Italian club lakah clean sheet an la nei ngai lo bawk.

Atalanta hian a vawi khat nan tun season-ah Champions League an khel ve chauha, an vawi khat Champions League khelhnaah quarter final khel turin an inpet tling thei.

PSG hi kum 2015-16 season hnuah a vawi khat nan Champions League quarter final an luta, kum 1994-95 season hnuah semi final an la lut leh miah lo bawk.

Atalanta hian quarter final lut tur hian round of 16-ah Spanish club Valencia chu aggregate-ah 8-4 laiin an hneha, PSG hian round of 16-ah German club Borussia Dortmund chu aggregate-ah 3-2 a hnehin quarter final an kai.

Team News:

Atalanta hian an goalkeeper Pierluigi Gollini chu a inhliam avangin an chhawr thei dawn lova, a aiah Marco Sportiello a khel ang.

PSG tan Kylian Mbappe a khel dawn em a sawi theih rih lova, squad-ah erawh a awm. PSG tan hian an midfielder pawimawh Marco Verratti leh Angel di Maria te an inkhel thei dawn lo chianga, Verratti hi inhliamin, Di Maria erawh suspend a nih avangin a inlan thei dawn lo a ni.

Copyright © inkhel.com 2024. All rights reserved.