UEFA Champions League Group match hnihna nizan khan khelh a ni a, English Club pahnih Chelsea leh Arsenal te chuan an khingpui an hneh lo ve ve a ni.
Emirates Stadium-ah Arsenal an tlawm
Group F-ah Arsenal chuan Dinamo Zagreb an hneh loh hnuah nizan khan Olympiakos 3-2 in an hneh lova, Arsenal tan Walcott leh Sachez te chuan an si phurh rul zel mahse 66th mins-a Finnbogason khung chu Arsenal chuan an rul thei ta lova, 3-2 in mikhual Olympiakos chuan hnehna an chang ta a ni.
Arsenal 2-3 Olympiakos
(Walcott 35′ Sánchez 65′) (Pardo 33′ Ospina 40′ OG, Finnbogason 66′)
PLAYER RATINGS (data source : Eurosport)
Arsenal: Ospina 4, Bellerin 5, Koscielny 4, Gabriel 5, Gibbs 5, Cazorla 5, Coquelin 4, Oxlade-Chamberlain 6, Ozil 5, Alexis 7, Walcott 6.
Subs: Mertesacker 6, Ramsey 6, Campbell 6.
Olympiacos: Jimenez 6, Elabdellaoui 6, Salinos 7, Siovas 6, Masuaku 6, Dominguez 6, Cambiasso 6, Kasami 5, Seba 6, Ideye 6, Pardo 7.
Subs: Finnbogason 7, Hernani 6, Vouros 6.
Set piece atangin Arenal hian goal hnih an chhuah a, goal hmasa ber hi 33rd mins-a lut a ni a, Olympiakos corner kal zel chu Pardo chuan a pet goal a. He goal hi 35th mins-ah Arsenal chuan Walcott hmangin an rul.
Arsenal hian counter attack hmangin an nawr a, Alexis Sánchez through ball tha zet chu Walcott chuan box chhungah umin, tha takin a push a, Olympiakos goalkeeper Jimenez Gago chuan a dang zo ta lo a ni.
First half tawp dawn minute 5 la awmin Arsene Wenger-a'n Cech aia a thlan zawk Ospina a chesual tlat mai le. Mual veilam atanga corner Kostas Fortounis pet tha zet chu Ospina hian an lamah a hui thla zauh a, goal line chhungah a sawt lut, hei hi nam chhuak leh mahse goal line referee chuan an lo hmu hman si a, half time a nih chuan 2-1 in mikhual Olymiakos chuan hma an hruai a.
Second half-ah Arsenal chuan beiseina thar an rawn nei leh a, 65th mins-ah dinglam atanga Walcott siam tha zet chu pen 8 vel lek atangin Sanchez chuan a tauh goal a, Arsenal chuan an si phurh an rul, mahse hemi hnu chiahah hian Olympiakos chuan Finnbogason hmangin goal an khung leh nghal zat si a, Felipe Pardo-a'n box dinglam atanga a siam tha zet chu Finnbogason chuan hnai set sawt atangin bottom corner-ah a thai lut a, 3-2 in Olympiakos an chak ta a a ni.
Group F match dangah Bayern Munich chuan 5-0 laiin Arsenal hneh loh Dinamo Zagreb an hneh a, goal khung bansan thei lo Robert Lewandowski chuan hattrick a siam leh nghe nghe a, Bayern Munich tan Douglas Costa leh Gotze ten goal an khung bawk a ni.
Khelh hnih atangin Bayern Munich chuan point 6 neiih Group hmahruaitu an ni a, Olympiakos leh Dinamo Zagreb te chuan point thum ve ve an nei a, Arenal erawh point an la hlawhchhuak ve lova, group mawngphah an ni mek.
Mourinho-a'n a club hlui a hneh lo
Mouriho chuan Champions League title a lak hmasakna ber leh a lar chhuahna club FC Porto a tlawh a, 2-1 in an club hlui hi a hneh zo lo a ni. Jose Mourinho chuan inkhel tan hmain nikuma Premie League player tha ber Hazard chu first XI atangin bench-ah a dah a, Matic leh Terry te pawh bench-ah a dah bawk.
FC Porto 2-1 Chelsea
(Brás André 39′ Maicon 52′) (Willian 45')
PLAYER RATINGS (data source : eurosport)
Porto – Casillas 6, Maxi 7, Maicon 6, Marcano 6, Martins Indi 6, Danilo 6, Neves 7, Imbula 7, Brahimi 9, Aboubakar 9, Andre 8.
Subs – Layun 6, Evandro 6, Osvaldo 6.
Chelsea – Begovic 7, Ivanovic 5, Zouma 6, Cahill 6, Azpilicueta 6, Mikel 5, Fabregas 7, Ramires 7, Willian 8, Pedro 7, Costa 7.
Subs – Matic 5, Hazard 6, Kenedy 5.
Real Madrid atanga Porto zawm Casillas chuan Champions League match 152 a khel tling ta a, record thar a siam ta. Goal hmasa ber hi 39th mins-a lut a ni a, box veilam atanga Yacine Brahimi shot tha zet chu Chelsea goalkeeper Begovic chuan a lo save a, a save per hi box chhung atangin chiang set sawtin André André chuan a pet goal chhunzawm, si khat faiin Porto chuan hma an hruai a.
First half tawp dawn 45th mins-ah Chelsea chuan Willian freekick goal ropui hmangin an si phurh an rul a, pawn veilam sir atang chuan Willian chuan Casillas-a awmna lamah a pet, heti chung hian Casillas a che hman lo, goal mawi tak a ni a, half time a nih chuan 1-1 in an inhnehtawk a.
Second half tan atanga minute 5 lekah Porto chuan corner an hlawhchhuak a, Rúben Neves corner pet tha zet chu Maicon chuan hnai set sawt atangin a tauh a, near post-ah a goal ho hle, Mourinho chuan an si phurh rulh tumin Matic, Hazard leh Nunes do Nascimento te dahlut mahse a tawp thlengin an si phurh an rul thei ta lova, 2-1 in FC Porto an chak ta a ni.
Group G match pakhat zawkah Dynamo Kiev chuan si hnih faiin Maccabi Tel Aviv an hneh a, Dynamo Kiev tan Andriy Yarmolenko leh Junior Moraes ten goal an khung. Dynamo Kyiv leh Porto te chuan point 4 ve ve an nei a, Chelsea chuan point thum neiin Maccabi Tel Aviv erawhin point an la hlawhchhuak lo a ni.