Zanin zanlaiah Champions League semi-final second-leg inkhel kan hmu leh dawn a, Ajax chuan Amsterdam Arena / Johan Cruyff Arena-ah Tottenham an lo mikhual dawn.

Team hnihte hian Tottenham Hotspur Stadium-ah first-leg an khel tawh a, Ajax hi si khat faiin an chaka, away goal khat neiin second-leg an khel dawn.

Chan tha zawk lutuk awm lo mahse Ajax hi an home a nih dawn bakah si khata hma hruai sa an nih avangin an chan a tha zawk deuha, inkhel hmuhnawm tak a nih ngei a rinawm.

Ajax hian an game hnuhnung berah Willem II chu si li faiin an sawp a, inrintawkna an nei sang hle dawn, Tottenham erawhin kar liamta khan Premier League inkhelah Bournmouth chu 1-0 in an hneh lo thung.

Semi-final lehlamah inkhel hmuhnawm tak kan hmu a, Liverpool chuan thil theih loh tluka ngaih an thlen tir. Ajax vs Tottenham pawh hi a nep dawn hauh lova, lehlam anga boruak nei sang nilo mahse Johan Cruyff Arena-a inkhel hi a en loh chi lovang.

Ajax hi an naupang tlanga, an harhvang tha bawka, tun season-ah Champions League-a khel hmuhnawm ber ti ila kan sawi sual tam lovang. An khel a fuh tawh laklawh chuan Real Madrid leh Juventus-te pawh dah nil thei an ni a, Tottenham tan thil awlsam a ni dawn lo.

Tottenham pawh an nep lo hle a, quarter-final a Manchester City pet tla thei an ni. Manager Mauricio Pochettino-a enkawlna hnuaiah Tottenham hi an chhe thei lo a ni ber a, an khel a fuh phawt chuan hneh theih loh an nei bik lo.

First-leg ah team hnihte hi an inbei tawk viaua, an khel tha lo ve ve na in an intum tawk hle a, Ajax in an bul tan that man telin 15mins-ah Donny van de Beek-a goal khung chu goal awmchhun niin Ajax hi an chak ta a ni.

Team News:

Ajax tan inhliam langsar an awm lova Hassane Bande leh Carel Eiting tih loh chu Tottenham hmachhawn thei lo tur an awm lo. Tottenham erawh an buai angrenga, an striker chhuanvawr Harry Kane a la inhliama, ani bakah hian Davinson Sanchez pawh a khelh theih a rinawm loh. Suspension avanga first-leg khel thei lo Heung min-Son a lo kir dawna, hei hi Tottenham tan chanchin tha a ni.

First-leg a inhliam Jan Vertonghen pawh Spurs tan a inlan thei dawn a, hmaikawr a vuah a ngai thung ang. First-leg a Tottenham tana khel thei lo pahnih Erik Lamela leh Serge Aurier-te chuan training an zawm leh tawh a, mahse inkhel bul an tan a rinawm lutuk lo.

Predicted line-up:

Ajax- Onana, Veltman, De Ligt, Blind, Tagliafico, Schone, De Jong, Ziyech, Van de Beek, Neres, Tadic.

Tottenham- Lloris, Trippier, Vertonghen, Alderweireld, Rose, Wanyama, Sissoko, Alli, Eriksen, Son, Lucas.