Under 17 Mizoram Team chuan nimin lamah SAI East Bengal hneh 2-1 in hneh lo mahse tukin khan Subroto Cup-ah Maharastra chu 7-0 laiin an sawp a, Mizoram hian quarter final luh theihna chance tha tak an nei mek a ni.
Mizoram hi Pool C-ah awmin, tukin vek khan nimin lama an hneh loh SAI East Bengal chu 2-1 in Sikkim lakah an tlawm ve thung a. Nimina an chak loh tum khan Mizoram tana Quarter final luh theihna chance tlemte awm chu an khelh baka hnehna chan vek a, SAI East Bengal an chetsualin a ni a. Tichuan SAI East Bengal an chak loh takah chuan Mizoram tan chance a tha ta hle mai.
October ni 4, 2015 hian Mizoram team chuan Pool C hmahruaitu Assam an hmachhawn dawn a, tunah hian Assam SAI chuan points 10 neiih Pool C hma an hruai mei a, Mizoram chuan points 9 neiin an dawt a, SAI East Bengal chuan points 7 neiin pathumnaah an awm mek a ni. Pool C -ah hian team 6 an awm a, Sikkim-in point 6 an nei a, Maharastra-in point 3 an nei a, Car Nicobar-in point an la hlawh chhuak lo a ni.
Tukina Mizoram tana Maharastra lama goal khungtute hi player hrang theuh pasarih an ni ! C Lalduhawma chuan tan atanga minute 11-na lekah goal hmahruai a khung a, F Malsawmtluanga chuan 14th mins-ah a chhunzawm a, M Lalrintluanga leh Jonathan Fanai te chuan first half-ah goal an khung ve bawk a, Mizoram hian half time a nih chuan 4-0 laiin hma an hruai tawh.
Second half 50th mins-ah Jacob Lalruatkima chuan Mizoram goal ngana a khung a, Silbana Lalruatkima chuan 52nd mins-ah goal a khung chhunzawm nghal zat a, 71st mins-ah Captain B Lalnuntluanga chuan Mizoram goal 7-na a khung ta a ni.