​Tyson Fury nakum lamah chauh a inhnek leh thei dawn

28th September 2016, 07:09PM

World heavyweight champion Tyson Fury chuan thla thar ni 29 a Wladimir Klitschko nen an rematch tur a hmachhawn theih loh hnuah a trainer Peter Fury chuan kumin chhunga a lo let tawh loh tur thu a sawi.

Tyson hian a World Heavyweight champion title kawl lai hum turin thla thar hian inhnek tur a ni a, mahse, a inhliam lehsi avangin an inhnek tur hi thulh a ni a, a hliamte dam a 100% fit leh tur chuan nakum lamah chuah a inpeih tur thu Peter Fury hian a sawi a ni.

Peter Fury chuan, "Hriselna lamah harsatna a nei a mahse, a lo let leh ang. A rilru leh a taksa 100% a a fit hma loh chuan ring chhunga a lut ka hmu duh lo." tiin a sawi.

Eddie Hearn, British world heavyweight champion Anthony Joshua promoter chuan Fury inhnuhdawh avang hian a title laksak a ni anga boxing a chawlhsan mai ang tiin a lo sawi tawh a. Hei hi Peter Fury chuan chhangin, "Chutiang thil chu a thleng har khawp ang. Tyson hi a that leh thuai ka ring a, a lo let leh vat ang." tiin a chhang a.

Sawi chhunzawmin, "Eddie hi tunah chuan promoter, doctor, psychiatrist, psychologist a ni kawp vek ni berin a lang. Tunah tak phei chuan Tyson-a team member a ni ang achhan chu Tyson hi a hre vek tlat." tiin Eddie hi a kap let a ni.

Tyson khelh leh theih hun tur zawhna chu, "Kumin chu a ni tawh kher lo ang, nakum lamah a lo let ka ring." tiin a chhang a ni.

Copyright © inkhel.com 2024. All rights reserved.