Kum 11 chhung teh meuh mai boxing khawvel a hneh loh tawng lo a roreltu Wladimir Klitschko chu November thla 2015 khan Tyson Fury chuan a rawn hneh a nih kha. Khami tum an inhnekah khan WBO, WBA leh IBF te chu chhuah a ni a, Tyson Fury hian heng title-te hi a la ta a. An boruak hi a tawp mai lo July thla khan rematch khel leh tur an nia mahse Tyson Fury hian hliam a neih avangin an inhnek thei lo a ni. Chuan tunah hian rematch hun tur an ti chiang leh tawh ta a, chu chu October ni 29 a ni.
Fury-a manager Peter chuan, "Hetia an inhnek leh thei tur hi ka lawm hle a, fans-te thil hmuh chak kan hmuhtir dawn ani" tiin a sawi. Klitschko pawhin twitter lamah, "Rematch hun tur a chiang thei ta a, October ni 29 hian Manchester Arena-ah ka thil tihsual siamtha turin ka hmu ang che" tiin a sawi ve bawk.
Manchester fighter Fury hian professional bout-ah hnehloh nei lovin vawi 25 a chak tawh a, hengah hian knockout 18 a nei a. Klitschko ve thung hi vawi 64 a chak tawh a, vawi 4 a chak loin knockout 54 a nei a ni.
Fury leh Klitschko te hi tawngkamin an inkap deuh chhen tawh a. Fury chuan, "I tan chuan a zahthlak a ni pathau tak i inhneh tir a. Infiam mite ang pawhin ka in enkawl uluk lo. Infiammi anga inchhal chu a mualphothlak hle ang" tiin Klitschko hi April thla khan a kap a.
Klitschko chuan, "Khami zana a tawp a kut phar zawk ka ni lo kha ka lawm. Hlawhchhamna hi duhthlan tur a ni lo, insiamtha tura kawng dang a awm lo te a nih ngawt loh chuan. Chuan ka insiamtha bawk ang" tiin April thla vek khan a sawi bawk.
June thla khan Klitschko chuan, "thil pakhat chiangsa a awm. Chu chu tun atanga reiloteah ka belt ka la let leh dawn tih hi a ni" tiin a July thla a an rematch tur chungchang hi a sawi a. Hemi ni vek hian Fury-a promoter Mick Hennessy chuan chhangletin, "Fury hian Wladimir Klitschko hi a fight thei lo a ni a chhan chu 100% fit a ni lo" tiin a hliam chungchang hi a lo sawi tawh bawk a ni.
"vanduaithlak takin, Fury-a team-te hian inremsiamna kan tih fel tawh chu vawi thum ngawt mai an ti danglam a, heihi a tawp tawh dawn a ni" tiin Wladimir Klitschko hian a sawi a ni.