22 May 2020 05:28

inkhel

Tyson Fury hi boxer pakhat ve mai a ni: Anthony Joshua

Anthony Joshua chuan Tyson Fury chu mi danglam bik a nih loh thu sawiin, a tan chuan boxer dang pakhat ve mai a nih thu a sawi.

Nikum December thlaah khan Anthony Joshua chuan Andy Ruiz a hneh a, IBF, WBA leh WBO title te chu a kawl vek a. Hemi hnuah hian Tyson Fury pawhin Deontay Wilder chu hnehin WBC title a kawl ve bawk a. British boxer pahnihte hi an chotuah mek a, boxer ropui zawk ni thei dinhmunah an ding ve ve mek a ni.

Joshua chuan, “Tyson Fury nen min chotuah a, hahipin an sawi bawk a, kei hi ka dinhmun pangngaiah ka ding reng dawn a, chu vangin tun aia inhnek ropui zawk hi a la awm fo dawn,” a ti.

“Ka za zek zek a, ka phur em em mai a. Fury hi mi danglam em em a ni hran lo a, ka tan chuan boxer dang pakhat ve mai a ni a. Mi tam zawk tan chuan inhnek ropui tak a ni ngei ang a, kei erawh chuan chuti takin ka dah lian lem lo,” a ti bawk.

A sawi zelnaah, “Ka sawi tawh angin Fury hi boxer pakhat ve mai a ni a, chutih rualin boruak an chhem alh thiam bawk a, hei vang tak hian inhnek vat vat chu ka chak tawh khawp mai,” a ti.

“Tlang chhipa din nawmzia leh ropuizia chu ka lo tem ve tawh thin a, chu tlang sang atanga pet thlaka awm hrehawmzia pawh ka hre tawh a, tunah chuan a chhipah ka ding leh tawh a ni,” tiin Joshua chuan a sawi.

“Tu pawh ka hmaah ding se, ka hnungtawlh dawn tawh lo a ni tih hi an hre chiang viau dawn a. Kubrat Pulev nen kan inhnek hnuah Tyson Fury nen WBC title kan inchuh leh thei ngei ang a, engkim neih tawh hnuah hloh lehtuin a neih let leh vek dan chu chiang takin an hmu dawn a ni,” a ti bawk.

Anthony Joshua leh Kubrat Pulev te chu June thlaah hian Tottenham Hotspur Stadium-a inhnek tura ruahmanna siam vek tawh niin, coronavirus vangin engmah sawi chian theih a ni ta rih lo a. Promoter Eddie Hearns chuan kumin kum tawp lamah chuan anni pahnih hi an inhnek theih ngei a beisei thu a sawi a ni.