British heavyweight boxer Tyson Fury chu Deontay Wilder nen an inhnek leh rih dawn loh takah chuan mi tam takin a tum leh tur an ngaihven hle a, tunah erawh a tum tur hriat a ni tawh.

World champion hlui Fury hian kumin June thla ni 15-ah German heavyweight boxer hneh loh la nei lo Tom Schwarz chu Las Vegas-ah a hmachhawn dawn.

Kum 29 mi Fury hi a vawikhat nan Las Vegas-ah a inhnek dawn a, a hmachhawn tur kum 24 mi Schwarz hi a theuneu dawn lo hle. Fury hi tun hnai mai khan ESPN nen fight nga daih contract an ziak thara, a contract man hi pound maktaduai 80 bawr vel lai niin chanchinbu mite chuan an tarlang.

Schwarz hi tunah hian WBO ranking-ah no.2 a ni mek a, vawi 24 inhnek tawhin vawi 24 a chak tawh. Fury pawh hian hneh loh a la tawng lova, vawi 28 a inhnek tawhah Wilder a inhnehtawkpui tih loh chu a la chak vek.

Fury-a promoter Frank Warren chuan Fury leh Wilder-te chu kumin kum tawp lamah an inhnek leh ngei a beisei thu a lo sawi tawh a, Fury chuan Schwarz a hmachhawn chak tawh thu sawiin America rama inhnek a chak thu a sawi tel bawk.

6ft 5.5in a sang Schwarz hian tunah hian WBO inter-continental heavyweight title a kawl meka, mahse Germany pawnah vawihnih bak la inhnek lovin, Fury anga boxer tha pawh a la tum lo a tih theih a, Fury-a lakah a nihna dik a hriat dawn pawh a tih theih awm e.