Tyson Fury chuan Deontay Wilder nen an inhnek huna a sum hmuh hmangin chenna nei lo te tanpui a tum tih a puang.

World heavyweight champion thin Tyson Fury chuan kar tawp hian Los Angeles khawpuia Staples Center-ah Deontay Wilder a hmachhawn dawn a, WBC title lak theih a tum dawn a. Fury hian an inhnekna atanga a sum hmuhte chu Britain chhunga chenna nei lo te tanpuina atan hman a tum a ni.

British boxer Fury hian California khawpuiah thil tam tak a zir chhuah thu sawiin, Los Angeles khawpui vela chenna nei lote nunphung chu a rilruah a awm lian hle tih thu a sawi a. Hetiang vel hian a rilru a hneh em avangin a pawisa hmuh tur pawh ama tana hmang vek loin, chenna in nei lo tanpuina atana man hi a tum phah niin a sawi.

“Kan khuaa ka haw hunah chenna in nei lote awmna tur in ka sa ang a, drug addict leh zu ngawl veite chhawmdawlna atan pawisa hmuh dan ka ngaihtuahsak bawk ang,” tiin kum 30-a upa Fury chuan a ti.

“California-a ka awm chu hlawkna tha tak a ni ber a, thil tha tam tak ka zir chhuah phah a, puitlinna kawngah pawh ka chhawr tangkai hle a ni,” a ti bawk.

A sawi zelnaah, “Nun dan kawng hrang hrang, kalphung hrang hrang, thil inang lo tak tak mai te chu nitin ka hmu a, heng thilte hian ka mit a timeng a. Khawlaiah chenna nei lo an tam em em mai a, ka dam chhunga ka hmuh tawhah chuan an la tam berin ka hria,” a ti a.

“Los Angeles chuanhnuai lampangah ka khawsa a, mahse kawngah minute 5 vel chauh kal pawh ni ila chenna in nei lo hmuh tur tam tak an awm hman zel mai a. Hetiang ka hmuh hian kan ram lama chenna in nei lote tanpui duhna hi ka thinlungah a len phah hle a ni,” a ti.