Heavyweight boxer Tyson Fury a ropui zual zel a, Las Vegas mipui tam tak hmaah khawvel boxer ropui ber pawl anih zia a lantir. Boxer rothap Tom Schwarz a hmachhawn a, harsatna lian tawk lovin second round-ah technical knockout-in a chak.

Fury leh Schwarz an inhnek hma hian Fury chak zawk tura rin niin; an inhnek chhung zawngin Fury a chungnung hle a, round an tan phat atangin Schwarz-an tawnhriat ngah tawh Tyson Fury-a kuttum a dawng zing hle.

An inhnek chhung zawng hian Fury-a lakah meuh chuan Schwarz-an a thiamna a hmang chhuak thei lova, amateur boxer ang maiin an thiamna a inthlau hle. Mi tam takin tunlai heavyweight boxer tha ber pawla an ngaih Fury-a hian a ban seina hmang tangkaiin Schwarz-an a hnek fuh theihloh nan a insiamrem zung zung. Kum 25 na hmang mek Schwarz a talbuai hle nghe nghe a. Second round an thleng, Fury-an southpaw stance-a ding chungin a hnek fuh ta zeuh zeuh a, ramhuai hmu ang ngeiin Schwarz a talbuai zui hle.

An inhnek chhung zawngin Fury a fimkhur hle a, a kut veilam hmanga chiang taka a hook fuh hnu phei chuan Schwarz-a hnar tliak tur khawpin a lang. Hemi hnu pawh hian ngam takin a bei zui duh lova, fimkhur takin a khel zui.

Hemi hnu hian Schwarz-a hian Fury kuttum a dawng ta mawlh mawlh a, a hnar thi a reh thei mai si lo, chiang zet maiin Fury-an a hnek thlu a, Schwarz erawh a rawn tho leh hram thei. Referee-in a inhnek tir leh, Fury-an ring sirah hnek zui nghal mawp mawpin referee Kenny Bayless-an loh theih lova a thelh a ngai ta thung.

MGM Grand Garden Arena-a mipui en zawng zawng chuan Fury an tan tih a hriat a, an intum chhung zawng pawhin mipui thawm a ring tha hle. Heti hi chuan sawisel hlawh taka a hnehtawkpui Deontay Wilder-a nen an intum nawn leh ngei a beisei awm ta hle a, khawvel boxer ropui anih zia chu a chhawm nung zel a ni ber.