Nizana twitter lama a Boxing a chawlhsan thu puangtu Tyson Fury chuan Media-te hi eng ang nge an nih tih a hriat duh vanga a chawlh thu sawi a ni tih a sawi. World Heavyweight champion Fury hian October ni 29 a Wladimir Klitschko nena an rematch tur chu hriselna lam chian loh vangin a lo inhnukdawk tawh a nih kha. Hei hi a vawi khatna a ni mai lo a, a hma pawhin hliam vangin an inhnek hun hi an sawn tawh bawk a. Tun tumah hian Boxing a chawlhsan mai dawn nia ngaitu an tam hle nghe nghe.

Fury chuan a chawlh thu a puan atanga darkar thum hnuah fiamthu a nih thu hi a rawn sawi leh a ni. Fury chuan, "Hahahaha, Gypsy lal hi heti maia awlsam hian i nuaibo i ring em ni? He hmunah hian ka la cham dawn. A tha ber hi. Media te hi eng ang chiah nge an nih tih ka entir mai che u a ni.Nakin lawkah ka dam anga ka World Heavyweight title kawl lai ka humhim ang." tiin a sawi a.

Chhunzawmin, "Chanchin lawmawm chu ka mamawh ang takin ka inenkawl a, a hma aia chakin ka lo kir leh ang, in theih chuan min dang dawn nia!" tiin a sawi bawk a ni.