13 Sep 2020 09:45

inkhel

Tuscan Grand Prix-ah Hamilton a chungnung ber

Lewis Hamilton chu Mugello ciruit-a Formula 1 Tuscan Grand Prix intlansiakah pakhatna a ni a, F1 huangah vawi 90 chu chak ber a ni ta.

Tuscan Grand Prix-a lap 59 an tlanah hian Mercedes bawk an che tha leh a, Lewis Hamilton pakhatna niin, a teammate Valtteri Bottas chu pahnihna a ni a. Alexander Albon chu pathumna niin, podium-a a lawn hmasak ber a ni a, Daniel Ricciardo chu palina a ni.

Mugello-ah hian car chesual pahnih an awm a, hei vang hian safety car an tlan chhuah mai bakah vawi hnih chu red flag a awm phah a. Max Verstappen chu a che fuh lo phawt a, Dutch driver hi a tlan chhunzawm thei lo nghal a. Kar hmasa lama Monza-a che tha tak Pierre Gasly chu a chesual a, safety car a tlan chhuak a, red flag an vai a ngaih phah a ni.

Intlansiak an tihtawp lailawk hnua an tlan lehin Carlos Sainz, Kevin Magnussen, Esteban Ocon, Nicholas Latifi leh Antonio Giovinazzi te chu an che buai hlawm a. Hamilton chu a che fuh chho thung a, a teammate Bottas khalhin hmahruaitu a ni chho a ni.

Valtteri Bottas chuan a teammate chu lehpelh ngei tumin theihtawp a chhuah a, a lehpelh theih dan tur ngaihtuahin Hamilton-a tyre hman ang ni lo hman a dil bakah strategy pawh a hrang hman a phut bawk a ni.

British driver Hamilton hi pit lane-a Bottas luh hnuah a lut a, a teammate tih dan hi a entawn ve leh ta tho a. A hnu deuhah Lance Stroll chu a chesual a, Racing Point driver hi 180 mph vela a tlan laiin a chesual a, hei vang hian red flag an vai a ngaih leh phah a, a vawi hnihna atan intlansiak chu an titawp lailawk leh a ni.

An tlan chhunzawm leh a, Hamilton chuan hma a hruai chhunzawm a, a tawp thlengin lehpel thei an awm ta lo a, tun season chhungin vawi 6 chu pakhatna a ni ta a ni.

Ferrari driver te an che tha vak lo hle a, Charles Leclerc chu pariatna niin, a teammate Sebastian Vettel chu 10-na a ni thei chauh a ni.

Pakhatna Lewis Hamilton hian Michael Schumacher a tluk teuh ta hle a, German driver ropui kha vawi 91 chu chak ber a ni hman a, chak hnem ber record a siam a, hei hi Hamilton chuan pakhat chiahin a la pha lo a ni.

2020 F1 Tuscan Grand Prix Result

1. Lewis Hamilton, Mercedes
2. Valtteri Bottas, Mercedes
3. Alexander Albon, Red Bull Racing
4. Daniel Ricciardo, Renault
5. Sergio Perez, BWT Racing Point
6. Lando Norris, McLaren
7. Daniil Kvyat, AlphaTauri
8. Charles Leclerc, Ferrari
9. Kimi Raikkonen, Alfa Romeo
10. Sebastian Vettel, Ferrari
11. George Russell, Williams
12. Romain Grosjean, Haas
DNF
Lance Stroll, Racing Point
Esteban Ocon, Renault
Nicholas Latifi, Williams Racing
Kevin Magnussen, Haas
Antonio Giovinazzi, Alfa Romeo
Carlos Sainz, McLaren
Pierre Gasly, AlphaTauri
Max Verstappen, Aston Martin