ATP Finals chu London khawpuiah an khel rei tawh dawn lo a, 2021-2025 chhung chuan Turin khawpuia khelh a ni tawh dawn a ni.

Nilaini khan tennis thuneitu sang chuan thu chhuah an siam a, 2021 atanga 2025 thlengin ATP Finals chu London khawpuia khel loin Turin khawpuia khelh a nih tur thu hi an puang a, Pala Alpitour stadium-ah khelh a ni dawn tih an sawi.

2021-2025 ATP Finals khelhna tur atan hian hmun hrang hrang an buk kual a. A tirah chuan khawvel hmun hrang hranga khawpui 40 ngawt mai an thlang chhuak a, heng hi an thli fim leh a, a tawpah Turin bakah hian Manchester, Singapore, Tokyo leh London te chu an dah hrang a. Heng dah hran zing atang hian an duh ber an thlang leh a, Turin chu duhtu an tam ta ber a ni.

ATP chuan, “Kum 50 zet chanchin lo nei tawh, ATP Finals chu a vawi khatna atan Italy ramah nghah a ni dawn a, Turin khawpuiah an khel dawn a. Turin hi ATP Finals nghahna khawpui 15-na chiah a ni dawn a, season-ending tournament hi 1970 atanga neih tan kha niin, Turin khawpuia nghah a nih hunah chuan Italy rama khelh a nih hmasakna ber tur a ni,” an ti.

2009 atang khan London khawpuia O2 Arena-ah ATP Finals hi nghah thin a ni a, entu mipui chu an khat thei viau a. Mahse, heti taka lar leh mi hlut hlawh a ni chungin, ATP chuan nikum August thla khan he inelna thleng duh dang tam tak an awm thu an puang tawh a. A thleng duhtu an awm chuan a hmun pawh an sawn kual tur thu hi an sawi tawh a ni.

1970 khan Tokyo khawpuiah ATP Finals hi an nei tan a, an khelhna hmun hi an thlak ve fo tawh a, a hming pawh hi an thlak kual ve nual tawh bawk a. New York khawpuiah chuan kum 13 zet mai an lo khel tawh a, Frankfurt khawpuiah pawh kum 6 an khel tawh bawk a. Heng bakah hian Hanover, Lisbon, Sydney, Houston leh Shanghai khawpuiah te pawh an lo khel tawh a ni.

ATP Finals-ah hian khawvela singles player leh doubles team tha zual pariat te chu an inel thin a. Nikum ATP Finals-ah khan lawmman $8.5 million zet a awm a, Alexander Zverev chuan Novak Djokovic chu a hneh a, title a la a ni.