Technology-in nasa takin hma a sawn, chumi khawvelah chuan an thanglian miau a, an duh emaw duh lo emaw; an khawvel a ni tlat tawh si. Nu leh pa te pawhin kan tleirawl leh rawltharte ngainat em em thil hi kan hriatpui ve zel a ngai chho dawn tlat, mi tam takin thil tangkai taka an hman laiin mawl fal deuhte tan erawh chhiatna a ni tlat si a.
Tunlai thalai ten an khelh nasat em em Online multiplayer battle royale game PUBG (PlayerUnknown's Battlegrounds) chungchang hi tun tum chu tarlang teh ang. PUBG hi South Korean Gaming Company Bluehole peng pakhat PUBG Corporation siam a ni a. (inkhel.com) Kum 2000 Japanese film Battle Royale behchhana siam niin kum 2017 March thla khan Microsoft Windows-a khelh turin Steam-ah dahchhuah a ni a. Kum 2017 December thlaah Full version tihchhuah niin hemi hnu lawk hian Xbox-a khelh theiha dahchhuah a ni leh a. Game khelh nuam tak a nih avangin Kum 2018 chhunga game ngainat ber pakhat a ni nghe nghe. Nikum September thla khan Andriod phone atanga a free-a khelh theih tura dah chhuah a ni leh chiah chu Mizoramah pawh thalai te tuipui ber pakhat a ni chho ta mek a ni.
GAME KALPHUNG
Chipchiar takin tarlang dawn ta ila a thui dawn lutuk, chuvang chuan PUBG mobile bik game kalphung tlangpui hi han tarlang ila. Engtik lai pawhin; zing dar 4-ah pawh nise, khelhpui tur an awm reng. Solo, Duo leh Squad-in a khelh theih a, squad-a khelh hi a lar ber a ni ngei ang. Squad khatah mi 4 zel an awm a, chung ho chu an tang ho ta thin a ni. Thlawhna atangin squad 25 (Mi 100) hmanraw nei lovin ram pakhatah an zuangthla, in leh hmun hrang hrang luh kualna tur a awm a, chutah chuan silai leh hmanraw chi hrang hrang an zawng khawm a, an inkap hlum char char a, a biruk rei theih loh bawk. Zone-in hmun khatah a khalh khawm a, a tawpa dam rei ber squad chu pakhatna (Winner Chicken Dinner) an ni ta thin a ni.
Player-te hi an inbe pawp thei vek a, khawvel hmun hrang hrang atanga khel ni mahse ral an rel ho thin, an khingpuite lo chang hovin; a chang leh an nawr ho a, an um bawk thin. Map a en theih vek a, (inkhel.com) veivah nan motor chi hrang hrang a hman theih bakah tuia kal nan lawngte pawh a hman theih leh zel bawk. Ranking hi a awm ve a, khelh that chuan an kaisang chho zel, a thiam leh thiam lo an khel ho tam vak lo, rank sang leh rank sang a inhmachhawn deuh zel. Ranking hi Bronze atanga bul tanin, Silver, Gold, Platinum, Diamond, Crown, Ace leh Conqueror te a ni a, Conqueror hi mobile-ah chuan a sang ber a ni.
Squad-a khelh hian game khat rei chhung hi a tawp thlenga dam chuan minute 30 chhung vel a ni a, team-a khelh a nih avangin game khelh chhung hi chuan a pause theih loh. Rank hi a tlakhniam theih avangin mumal lo deuha khelh a pawi lutuk, chu chu gamer ten an duh lo, an khelh chhung hi chuan tihbuai theih loh tluk an ni. Tin, internet hmanga khelh a ni a, internet erawh a heh em em hran lo, chutih laiin bandwidth a duh sang ve hret a, ping 300ms chin hnuailamah tha takin a khelh theih.
A THATNA
PUBG/PUBG Mobile game hian thatna em em sawi tur a nei tam lem lo, gaming thatna lam tarlang ta zawk ila. Tunlaiah E-Sports nasa takin a thang a, mobile leh computer siamtute pawhin game khelhna tur khawl an ngaipawimawh, mobile tha tak tak pawh a rawn chhuak chho mek zel. E-Sports leh Gaming hi sumdawnna lian tak a ni a, inelna hrang hrang sum tam tak tak awmna a awm chho zel dawn, hengah te hian kan thalai te hi han tel thei ngat selang chuan duhthusam a ni. Lehkha kan zir, hnathawh nan a ni, hnathawh chu sum hlawhchhuahna a ni. Chutiang bawkin gaming pawh sum tam tak hlawhchhuah theihna a ni a, nakkin lawkah chuan Football hmanga eizawnna kawng Mizo ten kan zawh chhoh mek ang hian Gaming lama eizawnna kawng kan thalaite hian an la zawh dawn chiang. Ram dangah chuan millionaire gamers an awm teuh mai, mahni tuina taka eizawn chu duhthusam a ni.
Youtube lamah gamer tha tak tak ten an game khel lai an phochhuak bawk a, heta tang hian sum tam tak an lalut thin bawk, hausak phah awk awk lah an tam. Game hian hriatna a ti zau em em bawk a, History tam tak kan hriat theih phah thin. Tin, technology khawvela cheng kan nih avangin thiamna sang zel hi gamer-te chuan an ban phak zel kan ti thei awm e. Computer thiamna lamah pawh gaming hian nasa takin gamer-te a pui thin. Tin, ram hrang hrangah thian tha tak tak a neih theih bawk a, global village a nih tawh avangin thian kawm nan a tha tak zet zet bawk.
A THAT LOHNA
Game khat khelh chhung minute 30 vel lek ni mahse game khat chiah a khelh theih loh. Game addictive tak a nih avangin hun a heh em em a, zirlai te tan lehkha zir nasat a ngaih lai chuan khelh vak chi a ni tlat lo mai. Zan a rei tulh tulh a, internet a chak tulh tulh, chetthat a awl tulh tulh bawk. Menrei a awl em em a, hei hian zirlai tan zirna lamah hnufumna a thlen mai bakah dam tha pangngai tan pawh hrisel lohna thlen thei a ni chiang bawk. Game khel suh kan inti ngawt thei lo, chutih laiin nu leh paten kan fate game khelh chin tawk bituk sak thiam a pawimawh khawp dawn a ni.
Gaming hi eizawnna tham a ni ti thin mah ila Mizoram atang hi chuan a la har deuh chu a ni. ‘Kan internet leh kan khawl te a tha ve tawh viau e,’ ti thin mah ila India ram chhungah pawh internet mumal lohna state kan la ni mek a, India ram chhung mai maiah pawh online multiplayer game-ah harsatna kan la tawk nasa hle, a lag zauh changin engkim a pawi hman tawh thin si a. (inkhel.com) Tin, India ram hi khawvel ram dang nena khaikhin pawhin internet chak lohna hmun a la ni leh zel, ram dang internet nei chak tak takte kara Mizoram atanga gaming-a eizawn lo tum chu a nuihzatthlak deuh hlek a ni.
Tun atanga kum 15 lo la awm tur chhung pawh hian ram dang kan el phak a la rinawm loh. Chuvang chuan eizawn nana hman tum tan chuan hun khawhralna mai mai a ni rih tlat mai, kawng dang dap rih mai a la tha rih e. Zirna hi kan uar deuh deuh a la ngai keini ang ram hnufualah hi chuan. Tin, Sports lamah pawh eizawn theihna kawng a inhawng mek zel bawk, kut hnathawh atanga sum tam tak la lut an awm reng reng bawk, Gaming lam chu eizawn nan la hmang rih lo phawt mai ang u.
Tin, mit a heh em em a, hriselna atan a pawi khawp mai gaming hi, chuvang chuan chintawk hriat hi mi fing nihna a ni a. Kan thiante Civil leh Central Service lamah an inziak tling chur chur, doctor leh engineer thahnem tak kum tin an chhuak mek reng bawk. Chutih laiin keini, "Game khatah mi 10 ka that," tia kan lo la insawi theih em em chhung chuan kan la hnufum hle tihna a ni. Mizoram pum huap touarnment-ah pakhatna lo ni ta pawh ni ila, kan sum hlawhchhuah kha thla khat chhunga hman zawh theih lek a ni, nupui fanau chawmna tham a ni lo. Mi fing chuan eizawnna mumal tak an neih hnuah hnathawh kara hahdam nan game an khel chauh, zirlaite tan gaming thupui bera kan la neih chuan kan hmabak a eng lem lo tih i hria ang u.
THUVAWN
Hei hi i vawng tlat reng ang u, "Game kan khel ang, nu leh pa te pawhin mobile game engemaw tal an khel ve vek. Chutih laiin kan zirna ti thuanawp thei turin emaw, kan hnathawh ti khaihlak thei turin emaw, chhungkaw nun hona tichhe thei turin emaw gaming hi i hmang lovang u khai. Chintawk i hria ang u."