British heavyweight boxer rothap Tyson Fury chu boxing magazine lar ber anga sawi ngam Ring chuan tunlai heavyweight boxer tha berah a thlang. Ring lo pawh hian Fury hi tunlai heavyweight boxer tha berah an thlang nuala, a langsar ber erawh Ring an ni.

Kum 30 mi ‘Gypsy King’ hi vawi 28 a inhnek tawha, tlawm la nei lovin vawi khat a tumpui a inhnehtawkpui tawh. Fury hi unified WBA, IBF, WBO, leh Ring magazine world heavyweight champion hlui a ni a, heng title-te hi kum 2015-a Wladimir Klitschko-a hneh tuma a hlawhchhuah an ni.

Klitschko a hneh avang hian Fury hian Fighter of the Year lawmman leh Upset of the Year lawmman te a lo dawng tawh nghe nghe. Mahse a IBF title a hlawhchhuah hnu atanga kar hnih hnu lawkah a IBF title hi hlihsak a ni .

Kum 2016 khan Fury hi zu lamah a talbuai avangin a inhnek hleithei lova, hemi avang hian a WBA leh WBO –te chu a dah awl zui leh bawka, kum 2018 khan Ring chuan an title a kawl chu an chhuhsak leh bawk a ni.

Kum hnih vel inhnek lova a awm hnuah Fury hi kum 2018 khan lo kirin, WBC world heavyweight champion lai Deontay Wilder a rawn cho va, he match hi draw-a puan a ni.

Kar liamta mai khan British boxer Anthony Joshua chuan rin lawk loh tak main Andy Ruiz a hneh lova, a heavyweight title kawl lai a hloh vek. AJ hi Ruiz-a lakah hian chak se chuan Fury ni lovin AJ zawk hi tunlai heavyweight boxer tha bera thlan chhunzawm a nih a rinawm.

AJ hi pakhatna atangin palinaah a tla thla a, Wilder pahnihnaah awmin, AJ hnehtu Ruiz chu pathumnaah a awm thung a ni. Panganaah British boxer dang Dillian Whyte a awm a, top 5-ah British pathum ngawt an lang a ni.