UFC 229-ah UFC lightweight champion Khabib Nurmagomedov leh Conor Mcgregor-te inhmachhawnin, fourth round-ah Khabib hian Mcgregor hi neck-crank submission hmangin a hneh.

Fight zawhah octagon pawna awm Mcgregor-a team mate pakhat Dillon Danis chu Khabib hian bei zuiin buaina a chhuak nasa hle a, octagon chhungah pawh Mcgregor leh Khabib-a team-te an lo buai ve bawk. Khabib hi Mcgregor nena an fight zawh velah Danis nen in ankhum zuiin, Khabib-a thinrim hi octagon bangah lawn chhuakin Danis hi a bei zui.

Khabib-a beih tak Dillon Danis hi hrelo kan la tam em em a, Mcgregor-a fan-te chuan a hmel leh hming hi kan hre fur tho maithei. UFC 229-a an buai hnuah Danis hi a lar thar hle a, a thenin Mcgregor-a jiu jitsu coach emaw trainer angin an sawi a, a dik lova, Mcgregor-a jiu jitsu coach chu SBG neitupa John Kavanagh a ni.

Dillon Danis hi Mcgregor-a training partner a ni a, kum hnih chhung The Notorious nen hian an thawkdun tawh. New Jersey, USA-a piang a ni a, tunah hian Hudson River, New York-ah a khawsa mek. Feet ruk chiah chiah a ni a, pound 175-a rit niin, middleweight-ah a in fight thin. Mcgregor-a’n UFC 196-ah Nate Diaz a hneh loh hnuin, SBG neitupa John Kavanagh chuan Danis hi Mcgregor-a jiu jitsu training pui turin a lalut a, tun thlengin fighter hnihte an la thawkdun a ni.

Dillon Danis hi MMA fighter leh jiu jitsu fighter a ni a, MMA lamah tawnhriat ngah lo mahse jiu jitsu lam erawh a luhchilhna a rei tawh. UFC-a luh a duh thu lo sawi tawh thin mahse Danis hi tunah hian Bellator MMA lamah a awm mek a, kumin April thla khan a fight hmasa berah Kyle Walker chu Bellator 198-ah submission hmangin second 98 chhungin a hneha, hei bak hi fight a la nei leh rih lo.