Borussia Dortmund chuan an player ‘luck’ tak Jadon Sancho chu tun thlasik bazar chhunga chhuah an tum lo hle a, mahse nipuiah an chelh theih loh mai an hlau tawh niin Germany lama Sky chuan a tarlang.

Sancho hi club hrawl tak takin an duh rawn a ni a, a mah duhtu zingah Chelsea, Manchester United, Barcelona leh Paris Saint-Germain te chu a langsar pawl ni mahse Dortmund hian he English rawlthar hi tun season atan chuan an la chelh theih hram hmel.

Sancho hian tunah hian kum 2022 June thla thleng daih contract Dortmund-ah hian a la nei a, a contract neih laiah hian release-clause a awm loh bawk avangin club dang tan lakchhuah mai mai a awlsam dawn lo.

Dortmund hian tun thla chhung chuan Sancho-a thlaktu tur hi an hmuh zawh an inrin loh avangin chelh hram an duh niin tarlan a ni a, nipuih erawh Dortmund hian Sancho thlaktu tur an melh tak tak a ngai tawh ngei dawn niin a lang.

Sancho hi Manchester City academy-a awm thin niin kum 2017 khan German club Dortmund hian an laluta, Germany a pan hnua beisei phak baka a chet that avangin club liante ngaihven rawn ni a, England senior tan pawh kum 19 chauh ni mahse game 11 khel tawhin goal 2 a khung tling tawh a ni.