​Tun thlaah Fernandes a chhuak lo maithei

23rd January 2020, 05:01AM

Portuguese midfielder Bruno Fernandes chuan Sporting Lisbon atangin Manchester United a zawm mai dawn emaw tih hnuah Fernandes-a agent Jorge Mendes chuan tun thla chhungin Fernandes hian Sporting a chhuahsan lo maithei tih thu a sawi.

Kar hmasa lam khan United hian Fernandes hi tun kar chhunga an lakluh ngei tawh tur thu chu chanchinbu mite chuan an ziak nasa hle a, mahse Fernandes hi Sporting a chhuahsan lawk thei dawn lo niin a lang mek.

United leh Sporting-te hi Fernandes-a manah inremna pawh an nei vek tawh nia tarlan a ni a, a man atan a vawiin pound maktaduai 60 vel zet chu United hian an seng dawn nia ngaih a ni hman.

Sporting hian heti anga United nen an indawr hnu hian Fernandes-a manah pound maktaduao 68 vel an duh leh si avangin inbiakna pawh duh angin a kal tluang ta lo tih chanchin bu mite chuan an tarlang.

Fernandes pawh hian Portugal atanga Premier League lama insuan chu a duh nia sawi ni mahse tun season chu Sporting lamah a hmang tluan leh mai lovang tih a sawi theih lova, Old Trafford pan tur chuan nipui a nghah mai a ngai maithei.

Fernandes-a agent Mendes chuan Fernandes-a’n United a zawm tur leh zawm loh tur chungchang zawhna chhangin, “He transfer hi a thleng ngei dawn em tih ka sawi thei lova, tun thlaah Fernandes hi a chhuak lo a nih chuan nipuiah erawh a chhuak ngei dawna, a chhan chu Sporting hi club dang nen an indawr tawha, eng emaw chu a thleng ngei ang,” a ti.

Copyright © inkhel.com 2024. All rights reserved.