16 Aug 2019 05:15

inkhel

Tun season chhung Cousins a inkhelh theih loh hmel

DeMarcus Cousins chuan a khup vei lam a tihnat avangin tun season chhung chu a inkhelh theih a rinawm lo hle.

Los Angeles Lakers center DeMarcus Cousins hi a khup vei lam tha a thler niin an hria a, hetiang a nih takah chuan 2019-20 NBA season-ah chuan inkhel thei lo dinhmunah a ding mek a ni.

Lakers chuan title la thei turin beihpui thlak an tum hle a, Anthony Davis an lak bakah vawi li ngawt NBA Most Valuable Player lo ni tawh LeBron James an la tawh bawk a. Hetianga an infawm khawm mek laia an thiampuipa pakhat Cousins a inhliam avang hian an beisei ang boruak an neih zui loh a hlauhawm hle.

Thawhtanniah khan DeMarcus Cousins hian Las Vegas khawpuia a insawizawi laiin mi dang pakhat nen an intipalh niin a agent chuan a sawi a. Cousins leh mi pakhat chu an khup an intauh palh a, hetah hian a khup vei lam tha chu a thler ngei niin an hria a ni.

Agent Jeff Schwartz chuan Nilaithawhtanah khan Los Angeles khawpuia an team doctor te chu Cousins hliam hi an entir niin a sawi a, doctor te chuan a nat dan te an en fiah hnuah a dam hun tur sawi theih a ni lo tih an hrilh niin a sawi.

Cousins hi tun hnai thla 18 chhunga na taka a inhliam vawi thumna a ni tawh a, tun tuma a khup tha thler hi siam tha tur chuan zai a ngaih hmel hle a. A khup hi an zai dawn a nih pawhin an zai theih hun tur pawh an la sawi chiang thei lo a ni.

Season liam taah khan DeMarcus Cousins hian Golden State Warriors-ah a khel a, kumin July thlaah khan free agent niin Los Angeles Lakers hi a zawm a, kum khat chhung atan contract a ziak a, a contract ziah hi $3.5 million man hu vel a ni.

January 2018-ah khan a kheimit tha a thler a, season tluanchhuak deuh thaw chu a inenkawl phah a. Golden State tan game 30 chu a khel thei ta tho a, playoff game hnihna an khelh tumin a malpui tihrawl a tina leh a, NBA Finals game hmasa berah pawh a tel theih loh phah a, Warriors chuan Toronto an hneh lo zui a ni.

Kum 29-a upa Cousins hian NBA huang chhungah season 9 chu a hmang ve tawh a, a average chu game tinah 21.2 points leh 10.9 rebounds ang vel a ni.