Video Assistant Referees (VAR) chu tun season Champions League khelh mek round of 16 atangin hman tan a ni dawn tih Sky Sports chuan a tarlang.

Champions League-ah hian VAR hi season thar atanga hman tura ruahhman phawt ni mahse, tun season atangin hman tan a ni dawn a, referee-ten puitu an nei tawh dawn.

VAR hi Europe-a league lian thenkhat chuan an hmang mek tawh a, kumin FIFA World Cup-ah pawh hman niin, a hlawhthling thawkhat hle. Sawilan tawh angin UEFA lam hian VAR hi season thar atangin Champions League-ah hman tum mahse thla hmasa khan UEFA thuneitu lam chuan tun season atanga hman tan a nih thut thei tih an sawi a, an sawi ang ngeiin thil a awm dawn ta niin a lang.

VAR hi Bundesliga, La Liga leh Serie A lamahte hman a ni tawh a, Premier League lam hian tunah an enchhin meka, season thar atang chuan Premier League pawhin VAR an hman ngei tawh a rinawm.

VAR duh lo pawl hi an tam hle a, football a ti hlu lo ang zawnga sawi pawh an awm nuk. Mahse VAR hman a nih atangin a tangkai zia a lang chho telh telh a, duh lotu an tlem chhovin, duhtu an pung telh telh a, football inelna lianthamah chuan tun atang hun rei lo teah VAR hi hman vek a nih a rinawm hle a ni.