08 Nov 2019 01:00

bakteaJr.

Mizo tlangval

​Tun season-ah Gomes kan hmu leh maithei

Everton midfielder Andre Gomes chu Premier League inkhela Tottenham nen an inhmachhawn tumin a ngal ruh a tliaka, damdawi in lam panpui nghal niin tun kar Thawhtanni khan hlawhtling taka zai a ni.

Gomes hi thla eng emaw zat a chawlh a ngai dawna, tun season chhungin a inkhelh theih tawh rinawm lo viau mahse Everton manager Marco Silva erawh Gomes chu tun season-ah a inkhelh leh hman a beisei thung.

Silva chuan, “Hlawhtling taka zai a ni a, engkim tluang takin a kala, tun season-ah a inkhel lai hmuh leh theih ngei pawh kan inbeisei. A lo kir hun tur tak hi kan tan sawi theih a ni lova, mahse kan hmuh dan leh kan medical staff-te atanga thu kan dawn dan chuan tun season-a lo kir lehna chance a nei.

“A inhliam dan kha kan hmu veka, injury ‘serious’ tak ni pawhin a lang. Eng mah thu chiang awm lo mahse thil tha tam tak pawh a awm ve bawk a ni,” a ti.

Tottenham player Heung-min Son-a’n Gomes hi a kherh thluk avanga heti anga inhliam chho hi a tih loh theih lova, replay lamah Son-a kherh thlu avanga a ke ruh tliak nilo mahse Son hi a ti tlu hmasa ber tu a ni. Son hi a inthiamlo hle a, khelmual chhungah pawh nasa taka tapin referee Martin Atkinson pawhin a hnawtchhuak zui.

Chiang zawka enin Gomes-a ke ruh tliah dan hi Son-a’n a kherh thluk zawha amah rawn chilh tu Serge Aurier vang zawk tih a lang chiang hle a, Son-a red card hmuh pawh hi sut sak a ni leh tawh nghe nghe a, hremna eng mah a hmachhawn dawn lo.

Silva chuan sawi zelin, “Khelmual chhunga awm zawng zawngte aiin Andre-a tan khan hun khirh a ni a, a tan harsa ber mahse a mah ti tlu tute Son leh Serge-te tan pawh hun hrehawm tak a ni ngei ang. Thil thlen dan khan kan hriatthiam a ngai a, Andre hi kawng tihrengah nasa taka kan thlawp a ngai a ni,” a ti bawk.