09 Nov 2019 12:23

bakteaJr.

Mizo tlangval

​Tun season-ah Emery an ban lovang: Parlour

Arsenal tana league game 300 chuang lo khel tawh English midfielder hlui Ray Parlour chuan Arsenal-in tun season chhungin an manager Unai Emery an ban a rin loh thu a sawi a, season tharah Champions League an khelh phak leh khelh phak lovah Emery hma hun a innghah a rin thu kum 46 mi Parlour hian a sawi.

Arsenal hi tun season-ah an che tha tawk lo hle a, khelh 11-ah vawi li chiah la chakin, vawi hnih an tlawm tawha, vawi nga lai an tumpuite inhnehtawkpui tawhin, tunah hian panganaah an awm meka, point 17 hlawhchhuak tawhin an chung chiaha awm Chelsea chuan point 6 in an pha lo mek.

Arsenal supporter-te chu an manager lakah an lung a awi lova, Emery hi chhuak tura an duh thu nasa takin an auchhuahpui leh mek tawh. Arsenal hian manager ban mai mai an ching lova, season 22 chhung teh meuh Arsene Wenger pawh an kawl a nih kha.

Arsenal midfielder hlui Parlour chuan, “Tun season chhungin Emery hi an ban ka ring lo tak taka, chance an la pe rih dawn. Europa League-ah an awma, Europa League pawh hian kawngro a su viau dawna, season liamta pawh khan final an thleng.

“Arsenal hi season thara Champions League khel tura an inpet tling lo a nih erawh chuan Emery hian Arsenal-ah chance a neiin ka hre lo. Arsenal hi Champions League khel turin an inpet tling thei dawn tih hi zawhna lian tak a awma, tuna an khelh dan en hi chuan a top 4 chu an la hlat hle.

“Emery hian hmasawn an ngaih zia a hria a, tlar hnung venhim lamah nasa taka hma an sawn a ngai. Hma an hruai hnua goal chhuah an ching em em a, chu chu kan hmu fo tawh a ni,” a ti.