Sunday liamta khan Premier League inkhela Liverpool leh Leeds United inhmachhawn tumin Liverpool rawlthar Harvey Elliot chu na takin a inhliam a, kum 18 mi hi tluang taka zai fel a ni.

He inkhelah hian darkar khat khelh a nih chiahin thil pawi tak a thleng a, Leeds-in bench atanga an dah luh Pascal Struijk chuan Liverpool rawlthar Elliot chu hlauhawm takin a kherhthlu a, Elliot hi na tiin leiah a tlu. Struijk hi referee chuan direct red card pe in a hnawt chhuak a, Elliot-a ke hi a tliak ngei niin a lang a, khelmual chhunga buaipui a nih hnuah zawn chhuah a ni.

Elliot hi khelmual chhungah hun eng emaw chen bawihsawm a ni a, a ke hi a tliak lova, a ngal rek ruh a pelh a, beisei anga a dam chhoh theih chuan tun season-ah a inkhelh leh theih a beiseinawm.

Khelmual chhunga Elliot buaipui tu ber pakhat Liverpool daktawr Dr.Jim Moxon chuan Elliot hian tun season-a lo kir theihna chance a neih thu a sawi a, mahse eng mah sawi lawk theih tak tak erawh a awm lo.

Leeds lakah Liverpool hian si thum faiin hnehna an chang zui a, Mohamed Salah, Fabinho leh Sadio Mane te chuan goal khat theuh khungin, Liverpool hi point 3 an hlawhchhuahpui a ni.