Manchester United striker Romelu Lukaku chuan tun aia a khelh that a ngaih thu leh manager Jose Mourinho nen an inbiakna chungchang a sawi.

Belgian striker chuan, “Rim taka ka thawh a ngai a, manager nen ni hnih liamta vel khan kan inkawm a, ani pawhin ka lak atanga a beiseite min hrilh. Keima lam atang pawhin tun aia ka khelh that hi a ngai tih ka hria a, hmalam thlir zela, hmasawn zel ka mamawh a, team tana tangkai zawka khelha, team chakpui hi ka tihtur a ni,” a ti.

“Lukaku chuan sawi belh zelin, “Ka inkhel tha tawk lova, tharum ka ngah tawk lo bawkin ka hria. Fulham lakah erawh ka khel tha thawkhatin ka inhria a, khatiang anga ka khel leh thei kha ka lawm hle bawk. Tunah chuan chumi chu chhunzawm zela, khelh that mar pat reng ka mamawh.

“World Cup-ah khan ka khel tha hle in ka hre bawk a, tharum nen khel mah ila, Premier League-ah erawh World Cup-a tharum ka neihdan kha a tawk lo. International football angin Premier League hi a khelh theih lova, World Cup atanga ka rawn kir khan World Cup-a ka khelh dan ang ringawt kha chu a tawk dawn lo tih ka hre nghal.

“World Cup zawh khan keimah pawh kha ka chau ve hle a, mahse kum 2014-ah pawh Everton-a ka awm lai khan chutiang chiah chu ka lo paltlang tawh. Tunah erawh ka dinhmun a tha chho leh tawh hle in ka hria a, ka inpeih reng a ni,” a ti.

Lukaku hian a zawnin game 12 chhung United tana goal a khung loh hnuah Southampton lakah goal a khunga, tun inrinni liamta khan Fulham lakah goal khung bawkin, kumin March thla hnuah a vawikhat nan Old Trafford-ah goal a khung lehna chauh a ni.