​Tuma hneh theih loh ‘Gypsy King’

15th September 2019, 05:09PM

Heavyweight boxing bout-ah British boxer rothap tak Tyson Fury leh Swedish heavyweight boxer Otto Wallin-te chu Las Vegas, T-Mobile Arena-ah an inbeia, inhnek hmuhnawm takah Tyson Fury hi unanimous decision-in a chak.

Tyson Fury hi hneh thei an la awm meuh lova, vawi 30 inhnek tawhin, vawi 29 lai a chaka, vawi khat Deontay Wilder nen an inhnehtawk.

Fury-a mit ko hi round tir lamah nasa takin a kak nghala, round kua vel zet mit ko kak chunga inhnekin Wallin lakah hnehna a chang.

Fury-a mit ko hi a kak nasat em avangin inhnek hi tihtawp hlauhawm khawp a ni hman hiala, mahse Gypsy King chuan a tawp thlengin a bei tluana, boxer rothap a nih zia khawvelin a hmu nawn leh.

An inhnek zawhah Fury chuan, “Fight ropui tak a ni a, ka mit a kak avang khan game kha a danglam phah nasa hle. Kan inhnek chhung khan a tam zawk chu ka mit kak lam khan ka hmu thei lova, kan intauha, a ka kak belh leh nghe nghe.

“Round 12 chhung tha takin kan inhneka, a hautak hle. Theihtawp ka chhuaha, tumruhna nen ka bei a, ani kha vawi 20 chaka hneh lo la nei lo a ni a, chak lo thiam lo ve bawk ni mahse ka tha zawk a ni,” a ti.

Copyright © inkhel.com 2024. All rights reserved.