16 Jul 2019 08:46

inkhel

Tuilian tanpui nan Hima Das-i’n a hlawh chanve a hlan

Hima Das chuan a thla khat hlawh chanve chu Assam rama tuilian tuarte tanpuina atan a hlan.

Indian sprinter Hima Das chuan tunlaia Assam rama tuilian tuarte chhawmdawlna kawnga hma lak loh chu dikin a hre lo a. Amah tak chu tunah hian Europe khawmualpui lamah a awm mek a, training camp-ah a inbuatsaih a, heti chung hian tuilian tuarte tanpuina hi a pe tho a ni.

Kum 19-a upa Hima Das hi Indian Oil Corporation hnuaiah Human Resource officer niin, IOC atanga a hlawh hmuh chanve chu tuilian tuarte tanpuina turin Assam Chief Minister’s Relief Fund-ah Thawhlehni khan a hlan a. Hei mai hi duhtawk loin, company leh pawl lian deuhte bakah tlema khawsak ziaawm deuh zawkte hnenah chuan an theih ang tawk tanpuina hi pe turin a ngen zui a ni.

Assam-ah tui a lian nasa viau mai a, district 33 zinga 30 chu tuilian hian a nghawng mek a. Tuna tuilian vang hian a lo berah mi 15 chuan nunna an chan tawh niin an sawi a, mi nuai chuang zette chu chenna nei loin an awm mek bawk a. Kaziranga National Park pawh 90% vel chu tuilian hian a chim mek niin an sawi.

‘Dhing Express’ tia hriat lar Hima Das chuan, “Assam tuilian hi a nasa em em mai a, tun dinhmunah chuan district 33 zinga 30 chu tuilian hian a tibuai mek a. Pawl leh company te bakah mihausa deuhte chu tanpui ngaite tanpui tur hian pen chhuak thei ila. Hetiang hun harsaah hian tu te pawh kan pawimawh a ni tih hriat a tha khawp mai,” a ti.

Hima Das hi Jakarta, Indonesia-a 2018 Asian Games-ah khan 400 metre race-ah a tel a, hetah hian second 50.79 hun a hmang a, hei hi Indian national record a ni.

Nikum July thlaah khan IAAF World U20 Championships 400 metre race-ah gold medal lain, India ram infiammi zingah chuan hetiang ti thei hmasa ber a ni.

All Assam Students Union (AASU) ah Hima Das hi sports secretary a ni mek a. Khawtlang duh loh, zu leh ruihtheih thil do kawngah hma a la nasa thei hle.